Ռուսաստանի Դաշնության, Ադրբեջանի և Իրանի նախագահներ Վլադիմիր Պուտինի, Իլհամ Ալիևի և Հասան Ռոհանիի հանդիպումը նախատեսվում է անցկացնել այս տարվա օգոստոսին՝ Սոչիում: Այդ մասին հայտարարել է Հյուսիսային Կովկասի հարցերով նախարար Սերգեյ Չեբոտարևը, հաղորդում է «Ռիա Նովոստին»:
«Այս տարվա օգոստոսին Սոչիում ամենաբարձր մակարդակով հանդիպում է նախատեսված երեք երկրների՝ Ռուսաստանի, Իրանի և Ադրբեջանի նախագահների միջև», – ասել է նա Թեհրանում կայացած «Իրան և Հյուսիսային Կովկաս. պատմությունը և համագործակցության հեռանկարները» խորագրով գիտաժողովի բացման ժամանակ:
Խոսելով Հյուսիս-հարավ տրանսպորտային միջանցքի մասին` նախարարը հավելեց, որ միջանցքը ռազմավարական նշանակություն ունի և անհրաժեշտ է ոչ միայն մասնակից երկրներին, այլև համաշխարհային հանրությանը, քանի որ այն ապրանքի էժան և հարմարավետ առաքում կկատարի հարավից հյուսիս և հակառակ ուղղությամբ:
«Հյուսիս-Հարավ» տրանսպորտային միջանցքի ստեղծման նախագիծը Հյուսիսային Եվրոպան կկապեի Հարավ-արևելյան Ասիայի հետ, այդ թվում`կմիավորի Ադրբեջանի, Իրանի և Ռուսաստանի երկաթուղիները: Առաջին փուլում նախատեսվում է տարեկան 5 մլն տոննա բեռ տեղափոխել միջանցքով, հետագայում`ավելի քան 10 մլն տոննա: