«Պարսից ծոցի գոտում օտարերկրյա ներկայությունը ապակայունացնում է տարածաշրջանի իրադրությունը և չի նպաստում տարածաշրջանի անվտանգության ամրապնդմանը»,- հայտարարել է Իրանի արտաքին գործերի նախարար Մանուչեհր Մոթաքին՝ երկրի Բենդեր Աբաս հարավային նավահանգստային քաղաքում բացելով Պարսից ծոցի հիմնախնդիրներին նվիրված միջազգային խորհրդաժողովը, որի մասին հայտնում է FARS գործակալությունը:
«Պարսից ծոցը կարևորագույն ռազմավարական շրջաններից մեկն է աշխարհի քարտեզի վրա: Այն հսկայական դեր է խաղում ժամանակակից քաղաքական ու տնտեսական միջազգային հարաբերություններում»,- նշել է Իսլամական Հանրապետության ԱԳ նախարարը: «Այդ պատճառով էլ նրանից հազարավոր կիլոմետրեր հեռու գտնվող տերությունները օգտագործում են ցանկացած պատրվակ տարածաշրջան թափանցելու համար: Նրանք ուժեղացնում են իրենց ռազմական ներկայությունը, տարածաշրջանում ստեղծում են ռազմակայաններ, ընդ որում, տեղի երկրների հաշվին, և կուտակում զինանոցներ»: Սակայն, Մոթաքիի խոսքով՝ օտարերկրյա ներկայությունը ոչ մի լավ բան չի բերել տարածաշրջանի ժողովուրդներին: «Այդ ներկայությունը ծառայում է միայն որպես ապակայունացնող գործոն ու բնավ չի նպաստում տարածաշրջանային անվտանգության ամրապնդմանը, ինչն ակներև է բոլորի համար»,- ասել է նախարարը: Նա ընդգծել Է Իրանի անփոփոխ դիրքորոշումը, ըստ որի՝ Պարսից ծոցի գոտու պետությունները միանգամայն կարող են ինքնուրույն ապահովել սեփական անվտանգությունը և արտաքին օգնության կարիք չունեն: «Իրանը, հետևողականորեն հանդես գալով տարածաշրջանային համագործակցության զարգացման և բարիդրացիության ամրապնդման օգտին, միշտ էլ կդիմակայի տարաբնույթ արկածախնդրություններին և տարածաշրջանում լարվածության բորբոքման փորձերին»,- հայտարարել Է Իրանի ԱԳ նախարարը:
