Ադրբեջանական APA լրատվական գործակալության փոխանցմամբ՝ երեկ Ստրասբուրգում կայացած Եվրախորհրդարանի նիստում քննարկվել է ղարաբաղյան հակամարտության կարգավորումը։
Եվրամիության արտաքին հարաբերությունների ու անվտանգության քաղաքականության բարձրագույն ներկայացուցիչ Քեթրին Էշթոնը հայտարարել է, որ Հայաստանն ու Ադրբեջանը պետք է կրկնապատկեն իրենց ջանքերը՝ մինչև տարեվերջ ավարտելու ղարաբաղյան հակամարտության կարգավորմանն առնչվող հիմնարար սկզբունքների համաձայնեցումը.
«Եկել է ղարաբաղյան հակամարտության կարգավորմանը հասնելու ժամանակը։ Դժբախտաբար, Կազանի հանդիպման ժամանակ չհաջողվեց հասնել ակնկալվող բեկմանը։ Ադրբեջանի և Հայաստանի նախագահները չկարողացան օգտվել ընձեռված հնարավորությունից՝ փոխզիջման հասնելու համար։
Սակայն կողմերը պետք է հավատարիմ մնան խնդրի դիվանագիտական լուծմանը։ Նրանք պետք է մինչև տարեվերջ իրականացնեն հիմնարար սկզբունքների համաձայնեցումը, քանի որ 2012 թվականին Հայաստանում, ապա նաև Ադրբեջանում սպասվող ընտրությունները կարող են դանդաղեցնել բանակցային գործընթացը։
Ստատուս-քվոյի պահպանումն անընդունելի է, և հակամարտության կարգավորումը դրականորեն կազդի տարածաշրջանի զարգացման վրա։ Հակամարտության խաղաղ կարգավորումը ԵՄ-ի համար բացառիկ կարևորություն է ներկայացնում։ Կարգավորումը հնարավորություն կընձեռի տնտեսական կայունության ճանապարհով վերափոխել Հարավային Կովկասի տարածաշրջանը։ Ոչ միայն կարող է բացվել հայ-ադրբեջանական, այլև՝ հայ-թուրքական սահմանը, որով և տարածաշրջանի երկրներն ավելի կմերձենան միմյանց։
ԵՄ-ը պատրաստ է աջակցել հակամարտության կարգավորմանը, այդ թվում՝ նաև ԵԱՀԿ Մինսկի խմբին, որն ուղղակիորեն ներգրավված է բանակցային գործընթացում։ Մենք կանոնավոր խորհրդակցություններ ենք անցկացնում ԵԱՀԿ Մինսկի խմբի հետ այն մասին, թե ինչպես օգնենք այս հարցում»։
Էշթոնը նաև հայտարարել է , որ մտադիր է այցելել Հայաստան և Ադրբեջան ղարաբաղյան հակամարտության կարգավորումը քննարկելու համար։
Էշթոնի հայտարարությունից հետո պատգամավորները քննարկել են հարցը։ Ելույթ ունեցածների մեծ մասը նշել է, որ ղարաբաղյան հակամարտությունը չպետք է անվանել սառեցված, և ստատուս-քվոյի առկայությունն անընդունելի է, ինչի համար էլ պետք է մեծ ջանքեր գործադրել խնդրի լուծման ուղղությամբ։
