«Դատախազության մասին» օրենքի շուրջ խորհրդարան-կառավարություն հրապարակային պայքարից հետո, իշխանության թևերի միջև նոր բանավեճ է հասունանում:
Արդարադատության նախարարությունը երկարաշունչ բացասական եզրակացություն է տվել մի խումբ պատգամավորների, այդ թվում` ՀՀԿ-ականների նախաձեռնած օրինագծին: Խոսքը «Տեղեկատվության ազատության մասին» 5 ՀՀԿ-ականների` Արտակ Դավթյանի, Մարգարիտ Եսայանի, Կարինե Աճեմյանի, Շուշան Պետրոսյանի և Կարինե Պողոսյանի, ինչպես նաև ՕԵԿ-ից Հեղինե Բիշարյանի, ՀՅԴ-ից Աղվան Վարդանյանի, ՀԱԿ-ից Արամ Մանուկյանի և «Ժառանգությունից» Ռուբեն Հակոբյանի նախաձեռնության մասին է: Հետաքրքրական է նաև, թե ՀՀԿ-ականներն ինչպես են քվեարկելու իրենց իսկ խմբակցության պատգամավորների հեղինակած օրինագծին, որին փաստացի դեմ է ՀՀԿ-ական կառավարությունը:
Կառավարության անցյալ շաբաթվա նիստի օրակարգում ներառված էր հարցի քննարկումը, առկա էր նաև Արդարադատության նախարարության բացասական եզրակացությունը, սակայն նիստի օրը նախագիծը հանվեց օրակարգից, և կառավարությունը չքննարկեց այն: Սակայն հաշվի առնելով Արդարադատության նախարարության առարկությունների ծավալը, դժվար է պատկերացնել, որ եզրակացությունը դրական դառնա: Կամ էլ օրենքի փոփոխության համահեղինակները պետք է ընդունեն կառավարության առարկությունները:
Օրենքի համահեղինակ ՀՀԿ-ական Արտակ Դավթյանը «Առաջին լրատվական»-ի հետ զրույցում ասաց, որ դեռ մանրամասն չի ծանոթացել եզրակացությանը: «Էն, ինչ որ կայքում դրված է, հասկանալի է, բայց վերջին ճշմարտությունը չի, որովհետև մենք էլ ունենք մեր առարկությունները»,- հայտարարեց ՀՀԿ-ական պատգամավորը` հավելելով. «Կարծում եմ, որ կհանդիպենք, կքննարկենք և կգանք ընդհանուր հայտարարի»:
Մեր հարցին` եթե կառավարությունը չփոխի իր եզրակացությունը, իրենք պատրա՞ստ են փոփոխություններ անել օրինագծում, ընդունել իրենց բոլոր դիտարկումները, ՀՀԿ-ական պատգամավորը պատասխանեց. «Դե գիտեք, էդպես չի լինում, որ բոլոր դիտարկումները ընդունում ես կամ չես ընդունում: Կնայենք, կծանոթանանք, կհասկանանք, թե կոնկրետ Սահմանադրության որ հոդվածներն են մեջբերում, և կաշխատենք, կարծում եմ, որ կգանք ընդհանուր հայտարարի: Տարբեր կետեր վերլուծելով` կարծում եմ, որ խնդիրը ոչ միայն զուտ իրավական, բովանդակային հարցերն են, այլ շատ հավանական է, որ դրանց զգալի մասը լինի իրավական տեխնիկայի պահանջներ»:
Արտակ Դավթյանի խոսքերով` օրինագիծը դեռ պետք է քննարկվի ԱԺ մարդու իրավունքների և հանրային հարցերի հանձնաժողովում: «Տեսնենք` հանձնաժողովը ինչ կասի»: Ըստ հեղինակների` օրենսդրական նախաձեռնության փաթեթը մշակվել է ԵԱՀԿ երևանյան գրասենյակի աջակցությամբ և Ինֆորմացիայի ազատության կենտրոնի, անկախ փորձագետների հետ խորհրդատվությամբ…
Ի վերջո, ինչ են ուզում օրենքի հեղինակները: Պատգամավորներն ուզում են գործող օրենքում «հստակեցնել տեղեկատվության ազատության ապահովման հիմնական սկզբունքները` դրանք լրացնելով օրինականությունը, հավաստիությունը, խտրականության բացառումը սկզբունքներով, և օրենքով սահմանված սկզբունքներից հանելով տեղեկությունները գրանցելու, դասակարգելու և պահպանելու միասնական կարգի սահմանման մասին սկզբունքը, որի ապահովումը գործնականում անիրագործելի է:
Հստակեցնել պարտադիր հրապարակման ենթակա տեղեկությունների ցանկը: Տեղեկության տրամադրման մերժման հիմքերը լրացնել նոր հիմքով` տեղեկության տրամադրումը մերժվում է նաև, երբ տեղեկությունը Հայաստանի Հանրապետության արխիվային կամ օրենսդրությամբ սահմանված կարգով պահպանվող այլ հավաքածուի հազվագյուտ և հատկապես արժեքավոր փաստաթղթի կամ այլ մշակութային արժեքի բնագիր կամ ոչ բավարար պահպանվածության վիճակ ունեցող փաստաթուղթ է:
Տեղեկության տրամադրումը չմերժելու հիմքերը լրացնել նոր հիմքերով` տեղեկության տրամադրումը չի կարող մերժվել, եթե դա դիմողի վերաբերյալ է կամ այլ անձի վերաբերյալ է, և դիմողն ունի տեղեկությունը հավաքելու, պահպանելու, օգտագործելու կամ տարածելու մասին այդ անձի համաձայնությունը, որը Սահմանադրության 23-րդ հոդվածի պահանջն է, և տեղեկության տրամադրումը չի կարող մերժվել, եթե դա թեև չի պարունակում օրենքով սահմանված տեղեկության տրամադրումը չմերժելու հիմքերից որևէ մեկը, սակայն կոնկրետ դեպքում ունի հանրային իրական նշանակություն, դրա սահմանափակումն անհրաժեշտ չէ ժողովրդավարական հասարակությունում, և տեղեկությունը չհրապարակելն ավելի մեծ վնաս կհասցնի հանրային շահին, քան դա հրապարակելը, այսպիսով հրապարակայնության, բացության և թափանցիկության սկզբունքը տարածելով հանրային հետաքրքրություն ներկայացնող և հանրային նշանակություն ունեցող հարցերի վրա:
Հստակեցնել տեղեկություններ ստանալու կարգը` կանոնակարգելով էլեկտրոնային եղանակով տեղեկություններ ստանալը, ինչպես նաև սահմանելով տուրքերի և այլ վճարների մուծման կարգը:
