Կիրակի Հյուսիսային Կորեայում բարեհաջող են անցել Գերագույն ժողովրդական ժողովի՝ միապալատ խորհրդարանի ընտրությունները: Այս մասին ասվում է ԿԸՀ հաղորդագրությունում ՝փոխանցում է Հյուսիսային Կորեայի կենտրոնական հեռագրային գործակալությունը:
111-րդ ընտրատարածքում, որտեղ պատգամավորական թեկնածու էր առաջադրված Կիմ Չեն Ինը, գրանցվել է 100 տոկոսանոց մասնակցություն: Հանձնաժողովի տվյալներով՝ քվեարկության արդյունքները վկայում են, որ ժողովուրդն ու բանակը միաձայն աջակցում են և լիովին վստահում Աշխատանքային կուսակցության առաջին քարտուղարին:
Երկրի բարձրագույն օրենսդիր մարմնի ընտրությունները թույլ կտան ամրապնդել Կիմ Չեն Ինի ղեկավարության ներքո ժողովրդական իշխանությունը, կնպաստեն Հյուսիսային Կորեայում հզոր սոցիալիստական պետության ստեղծմանը: ITAR-TASS-ի հետ զրույցում նման կարծիք է հայտնել այդ տարածքի ընտրական հանձնաժողովի նախագահ Կան Ուն Մանը: Նա նշել է, որ քվեարկելու իրավունք ունի 17 տարին լրացած ցանկացած քաղաքացի: Համաձայն երկրի Սահմանադրության՝ պատգամավորների լիազորության ժամկետը 5 տարի է:
Սրանք խորհրդարանական առաջին ընտրություններն են 2011-ի դեկտեմբերից ի վեր, ինչ իշխանության գլուխ եկավ Կիմ Չեն Ինը: Ընտրությունն անցկացվել է համերգների ուղեկցությամբ: Ուղիղ գաղտնի քվեարկության արդյունքում ընտրվել է 687 պատգամավոր: Յուրաքանչյուր ընտրատարածքից առաջադրվում է մեկ թեկնածու: Հյուսիսային Կորեայում քարոզչությունը գլխավորապես ուղղված է ընտրողների առավելագույն բարձր մասնակցության ապահովմանը: Ավանդաբար բոլորն առանց բացառության աջակցում են առաջադրված թեկնածությունները:
