«Դեռ վաղ երիտասարդ շրջանում եղել եմ հրամանատար և կարող եմ ասել, որ նույն փորձն արվում էր պաշտոնական Երևանի կողմից, երբ ՀՀՇ-ից ջոկատներ էին ուղարկում այն տարածքները, որտեղ պահպանողները դաշնակցական ջոկատներն էին։
Տպավորությունն այնպիսին էր, որ ՀՀՇ-ականները փորձում էին ամեն ինչ անել, որ ինչ-որ բնակավայր կամ դիրք հանձնվեր, որպեսզի մեղադրեին տեղի ջոկատներին։ Հիմա էլ մոտավորապես նույն ձեռագիրն է»,- «Առաջին լրատվական»-ի հետ զրույցում անդրադառնալով վարչապետ Փաշինյանի այն հայտարարությանը, թե Արցախում վարչապետի և կառավարության դեմ հակաքարոզչություն է ընթանում, և ինքը տեսնում է ընդհուպ դավադիր պատերազմ հրահրելու, անգամ որոշ տարածքներ հանձնելու և տեղի ունեցածի պատասխանատվությունը Հայաստանի կառավարության վրա դնելու հեռահար նպատակ, ասաց «Միացյալ Հայաստան» կուսակցության նախագահ, Մարտական խաչի ասպետ Վահան Բադասյանը։
Շարունակելով իր միտքը՝ Բադասյանը նշեց. «Իսկ ո՞վ է այսօր Ռոբերտ Քոչարյանը կամ Սերժ Սարգսյանը, նրանք Լևոն Տեր-Պետրոսյանի նախկին ՀՀՇ-ականներն են ու նույն ոճը շարունակում են, նրանք հանձնեցին Մարտակերտն ու Շահումյանը, որպեսզի մեղադրեն Դաշնակցությանը։ Հենց այդ ժամանակ էլ Ռոբերտ Քոչարյանն առաջին անգամ զավթեց իշխանությունը, ինչին ոչ ոք ուշադրություն չի դարձնում։ Այն ժամանակ արդեն լինելով հասուն ռազմական գործիչ և ոչ հեռու քաղաքականությունից՝ կարող եմ ասել, որ նա որպես սեպարատիստ զավթեց իշխանությունը՝ օրինավոր իշխանության կողքին ստեղծելով մեկ այլ, այսպես կոչված, իշխանություն, որը կոչեց պետական պահպանության կոմիտե։ Սամվել Բաբայանին ինքը կարգեց, այսպես կոչված, հրամանատար, երբ Սամվել Բաբայանը հիմա ասում է՝ ընկավ իմ ուսերին, դա պատմական սուտ է, նա նշանակված էր, որպեսզի պահպանի ու բարելավի Քոչարյանի իշխանության գալը, նա իր կողմնակիցներով ֆիզիկական ճնշմամբ հեռացրեց Կոմանդոսին, ու եղան մեր բոլոր պարտությունները։ Միայն Վազգեն Մանուկյանը պաշտպանության նախարար նշանակվելով՝ կարողացանք կանգնեցնել հակառակորդի առաջխաղացումը, նա չթողեց ՀՀՇ-Դաշնակցություն կռիվ, ստեղծվեց մեկ բանակ։ Մենք կարող էինք վերադարձնել նաև Շահումյանը, բայց այդ ժամանակ Վազգեն Մանուկյանին հեռացրեցին»։
Բադասյանն ընդգծեց՝ պատմությունը կարող է կրկնվել: «Նիկոլ Փաշինյանն իրավացի է, նրանք փորձում են պատերազմ հրահրել, որպեսզի ամբողջ մեղքը բարդեն հեղափոխության վրա, բայց դա թույլ չենք տալու։ Մենք զգոն ենք, ամեն ինչ անելու ենք, որպեսզի սեպարատիստները չկարողանան 30 տարվա վաղեմություն ունեցող իրենց սեպարատիզմն ու սաբոտաժիզմը կրկնել։ Սա մեծագույն սաբոտաժ է Ռոբերտ Քոչարյանի ու իր կողմնակիցների կողմից։ Ցանկացած մարդ, ով պաշտպանում է Քոչարյանին, սաբոտաժի աջակից ու դավաճան է։ Բակոներն ու արկադիղուկասյանները նրա հանցագործությունները շարունակողներն են։ Սամվել Բաբայանից սկսած՝ բոլորը պետք է գնան պատմության գիրկը, ամեն մեկն իր պատասխանատվության չափը վերցնելով՝ պետք է գնա պատմության գիրկը»,- եզրափակեց նա։
