Ռուսաստանը Ղրիմում միանգամայն հասկանալի ու ադեկվատ է: Այս մասին այսօր «Առաջին լրատվական»-ի հետ զրույցում ասաց Carnegie Endowment հաստատության մոսկովյան գրասենյակի փորձագետ Ալեքսեյ Մալաշենկոն՝ անդրադառնալով ղրիմյան զարգացումներին:
Նա նշեց, որ Ռուսաստանը Ղրիմում բավականին ադեկվատ ու սպասելի էր, ինչպես սպասելի էր նաև Արևմուտքի արձագանքը:
«Հասկանալի էր, քանի որ մի կողմից՝ այն բանից հետո, երբ Պուտինը հայտարարեց այն մասին, որ մանևրներն ավարտվել են, իրավիճակը փափկել է, մյուս կողմից՝ ակնհայտ է, որ Ռուսաստանը պայքարելու է Ղրիմում իր ազդեցության պահպանման համար, թեև անհայտ է, թե ինչ ազդեցություն՝ միգուցե ՌԴ-ին Ղրիմի միացման կամ անկախության համար, բայց ամեն ինչ որոշվում է այս օրերին: Պուտինը ելույթ ունեցավ, և ըստ իս՝ ոչ այնքան հասկանալի բաներ ասաց: Ռուսաստանի մոտեցումը Ղրիմի նկատմամբ ընդհանուր առմամբ ադեկվատ չէր, ինչպես ադեկվատ չէր Ուկրաինայում ստեղծված իրավիճակը»,- նշեց Ալեքսեյ Մալաշենկոն: Վերջինս ասաց, որ հիմա պարզել, թե ով է ավելի մեղավոր, չէր փորձի, քանի որ բոլոր կողմերն են սխալներ գործել, այդ թվում՝ Ռուսաստանը, բայց այն, թե ինչպես կայացավ Մայդանը՝ ևս նորմալ չէր: Նա խուսափեց Ղրիմում ծավալվող իրադարձությունների ու Արևմուտք-ՌԴ դիմակայության ապագայի մասին կանխատեսումներ անել:
Հարցին՝ ՌԴ գործողությունները չե՞ն խախտում արդյոք միջազգային իրավունքի նորմերն ու անվտանգության նոր գործիքների անհրաժեշտություն առաջ բերում, պատասխանեց, որ Ղրիմում տեղի ունեցողը կապ չունի տարածաշրջանում անվտանգության սպառնալիքի հետ:
