Ադրբեջանական APA լրատվական գործակալության փոխանցմամբ՝ Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ափաթուրայը Բաքվում հանդիպել է ՆԱՏՕ-ի խորհրդարանական վեհաժողովում ադրբեջանական պատվիրակության ղեկավար, Միլի մեջլիսի (խորհրդարան) առաջին փոխնախագահ Զիյաֆեթ Ասկերովի հետ։
Հանդիպման ժամանակ Ասկերովը նշել է, որ Ադրբեջանը ՆԱՏՕ-ի «ամենասերտ» դաշնակիցներից մեկն է՝ հավելելով, որ պաշտոնական Բաքուն ՆԱՏՕ-ի հետ հաջողությամբ համագործակցում է քաղաքական, դիվանագիտական, բարեփոխումների, ահաբեկչության դեմ պայքարի ոլորտներում։
Ասկերովը ՆԱՏՕ-ին կոչ է արել արդար լինել ղարաբաղյան հակամարտության կարգավորման հարցում և ակտիվ լինել ՄԱԿ-ի ԱԽ բանաձևերի ի կատար ածման հարցում։
Ափաթուրայն իր հերթին բարձր է գնահատել Ադրբեջանի հետ ՆԱՏՕ-ի հարաբերությունները, շնորհակալություն է հայտնել ադրբեջանական կողմին՝ Աֆղանստանի հարցում ցուցաբերած աջակցության համար։ Ափաթուրայը նաև ընդգծել է ռազմավարական և տարածաշրջանում ահաբեկչության դեմ պայքարի տեսանկյունից Ադրբեջանի կարևորությունը։ Ըստ Ափաթուրայի՝ գոյություն ունեն լավ հնարավորություններ՝ ՆԱՏՕ-ի ու Ադրբեջանի միջև հարաբերությունների խորացման ու զարգացման համար։
Հիշեցնենք, որ օրեր առաջ ԱրմԻնֆո գործակալությանը տված հարցազրույցի ժամանակ Ափաթուրայը ղարաբաղյան հակամարտության կարգավորման հետ կապված նշել էր.
«ՆԱՏՕ-ն հավատարիմ է այն հայեցակարգին, ըստ որի՝ Լեռնային Ղարաբաղի հակամարտության ուժային լուծման դեպքում հաղթողներ չեն լինի: Մենք հավատում ենք, որ երկու կողմերը կպարտվեն ռազմական լուծման դեպքում, և առաջին հերթին կպարտվի շարքային քաղաքացին երկու երկրներում, քանի որ կորուստներ կկրի իր տնտեսական հնարավորությունների իրացման գործում:
Բացի այդ, նման սցենարն ի չիք կդարձնի վերջին մի քանի տարիներին ձեռք բերածը: Ուստի դիվանագիտական ուղին միակ ճանապարհն է մեզ համար, որը կարող է հանգեցնել կշռադատված և փոխընդունելի լուծման»։
