ԱԺ ՀՀԿ խմբակցության ղեկավար Գալուստ Սահակյանը անհիմն է համարում մամուլում շրջանառվող տեղեկությունները, թե իշխող մեծամասնությունը Պարտադիր կուտակային կենսաթոշակային համակարգի ներդրումը մեկ տարով հետաձգելու վերաբերյալ կուլիսային խոսակցություններ ու քննարկումներ է ունենում:
«Նման քննարկումների ես չեմ մասնակցել և չեմ կարծում, որ նման քննարկումներ եթե եղած լինեին, ես տեղյակ չէի լինի»,- ասաց նա:
Հարցին՝ շարունակո՞ւմ է արդյոք պնդել, որ կուտակային համակարգը քայլ առաջ է, բողոքի զանգվածային ակցիաները մտորումների տեղիք չե՞ն տալիս, Սահակյանը պատասխանեց. «Իհարկե, աշխարհն է էդ ճանապարհով գնացել: Աշխարհի բոլոր տիպի բարեփոխումները կատարվում են պարտադիր: Իմիջիայլոց, նորանկախ Հայաստանում, երբ մենք անկախ պետության ճանապարհով էինք գնում, որևէ մեկը հանրաքվեի չդրեց տնտեսական համակարգ փոխելը, տնտեսությունը ազատականացնելը, որևէ մեկը հանրաքվեի չդրեց, որ փողերի փոխման հարցը ժողովուրդը որոշեր, որովհետև, բնականաբար, ժողովուրդը չէր կարող որոշել: Էդ՝ մանավանդ փողերի փոխումը, բոլորի ընտանիքները աղքատացրեց միանգամից, բայց ես դա ճիշտ եմ համարում»:
Սահակյանը մասնավորեցրեց՝ այնպես չի, որ բարեփոխումները այն տիպի պիտի լինեն և այնքան սիրելի, որ ժողովուրդը դրանք գրկի ու նստի: ՀՀԿ խմբակցության ղեկավարի խոսքով՝ դա կարողանում է անել այն քաղաքական ուժը, որն ավելի վճռական է:
«Հլա դուք պատկերացրեք` քսան տարի, երեսուն տարի են ասում, մեզ ի՞նչն է ստիպում, որ դրան գնանք, այսինքն` առանձնապես ժողովրդի բողոքի վերաբերմունքն ենք մեզ հետ վերցնում, ոչինչ՝ ժողովրդի մոտ թիրախային ենք դառնում, բայց տարիներ հետո կզգան, որ դա ի նպաստ իրենց է արվել»,- ասաց նա:
Հետաքրքրվեցինք՝ Սահակյանների ընտանիքում արդյոք ֆոնդեր ընտրե՞լ են արդեն, ի պատասխան՝ խմբակցության ղեկավարը նշեց, որ իրենց ընտանիքում ինքն ու կինն են. փոքր տղան 1974 թիվ է, մեծ տղան՝ 1972: Ի դեպ, վերջինս պատրաստվում է անգամ առանց Սահակյանին հարցնելու կուտակային համակարգի մասնակից դառնալ:
Լուսանկարը` PanARMENIAN Photo-ի
