Ուղիղ մեկ տարի առաջ այս օրը՝ ապրիլի 22-ին, տեղի ունեցավ այն ժամանակվա վարչապետ Սերժ Սարգսյանի և հեղափոխության առաջնորդ Նիկոլ Փաշինյանի հանդիպումը։ Այդ հանդիմումը բեկնումային նշանակություն ունեցավ հեղափոխության ընթացքի ու հաղթանակի հարցում։ Ու այդ նշանակությունն ունեցավ ոչ միայն ու ոչ այնքան բուն հանդիպման փաստը, որքան դրա ընթացքում Սերժ Սարգսյանի կողմից Մարտի 1-ի հիշեցումը։ Այդ հիշեցումը հասարակությունն ընկալեց որպես նոր Մարտի 1-ի սպառնալիք, և հրապարակը դարձավ էլ ավելի մարդաշատ։ Մարդիկ հասկացան, որ միայն մարդաշատությունը կարող է իշխանությանը հետ պահել Մարտի 1-ի կրկնությունից։
Թեմայի շուրջ «Առաջին լրատվական»-ի հետ քննարկմանը մասնակցեցին քաղտեխնոլոգ Արմեն Բադալյանը, քաղաքագետներ Գոռ Մադոյանը և Էդգար Վարդանյանը:
Ա. Բադալյանի խոսքով՝ Սերժ Սարգսյան- Նիկոլ Փաշինյան հանդիպումը ցույց տվեց, որ այն ժամանակվա վարչապետը չէր տիրապետում ստեղծված իրավիճակին. «Մտածում էին, որ Ն. Փաշինյանին և ևս մի քանի հոգու կկալանավորեն, և շարժումն անկում կունենա, ինչպես եղել է նախկինում, բայց երբ որ հարյուր-հազարավոր մարդ դուրս եկավ հրապարակ, հասկացան, որ իրավիճակը վերահսկողությունից դուրս է մնացել, և անգամ «Մարտի 1» չեն կարող իրականացնել»:
Ա. Վարդանյանի դիտարկմամբ՝ Ս. Սարգսյանն այդ հանդիպման միջոցով ուզում էր խնդիր լուծել՝ ժամանակ ձգել, զիջումներ ստանալ, բայց տեսավ, որ գնացքն արդեն անցել է, և ինքն ուշացել է. «Ս. Սարգսյանը և նրա թիմակիցները հանձնվեցին, քանի որ հասկացան, որ եթե հապաղեն, ժողովուրդը կարող է կոշտ միջոցների դիմել, և հեղափոխությունն ամեն դեպքում կլիներ…»:
Գ. Մադոյանի կարծիքով՝ ժողովրդական գործընթացը կարող էր այլ ընթացք ունենալ. «Դրա լավագույն ապացույցը Կ. Կարապետյանի պահվածքն էր Ս. Սարգսյանի հրաժարականից հետո, երբ որ փորձում էր դիմադրել, չընդունել Փաշինյանին և վերցնել իշխանությունը: Ս. Սարգսյանի ամենալավ ժառանգությունը իր հրաժարակի տեքստն էր, որտեղ ասում է՝ Նիկոլ Փաշինյանը ճիշտ էր, և դրանով ապագայի համար դիվիդենտներ է տալիս իր հակառակորդին:
Հայաստանի իշխանությունների համար ի՞նչ տրամաչափի փորձություն է այն, որ պաշտոնական լիազորությունները չարաշահելու համար մեղադրանք է առաջադրվել Պետական վերահսկողական ծառայության պետ Դավիթ Սանասարյանին. այս հարցին ի պատասխան՝ Գ. Մադոյանը նշեց, որ սա չափազանց լավ քննություն է նոր իշխանությունների համար. «Երբ դատավարությունը կընթանա արդար և թափանցիկ, և քննության արդյունքում բոլոր կողմերը համակարծիք կլինեն արդյունքների հետ: Թեև Դ. Սանասարյանի պաշտոնական կողմը հայտարարել է, որ համաձայն չեն մեղադրանքի և ընթացող իրավական գործընթացների հետ»:
«Նախկինում եթե նման կասկածանք լիներ ՊՎԾ պետի նկատմամբ, այդ հարցը փակ սենյակում կլուծվեր, և քրեական գործ չէր հարուցվի»,- նշեց Ա. Բադալյանը՝ ընդգծելով, որ Դավիթ Սանասարյանի անմեղության կանխավարկածը չպետք է ոտնահարել: Նա նաև նշեց, որ քաղաքական գրոհ կա այս գործի վրա:
Մանրամասն՝ տեսանյութում:
