ԱՄՆ-ում մեղադրանքներ են առաջադրվել հանցավոր խմբավորման 32 անդամների դեմ: ԱՄՆ իշխանությունների տվյալներով՝ հանցավոր խմբավորումը լյուքս դասի ավելի քան 160 մեքենա է առևանգել՝ դրանք այնուհետև Աֆրիկա ուղարկելու համար: Այս մասին ամերիկյան Տոտովա քաղաքում (Նյու Ջերսի) հայտարարել է դատախազ Ջոն Հոֆմանը՝ փոխանցում է ITAR-TASS-ը:
Նրա խոսքով՝ չարագործները գործել են փոքր խմբերով: Նրանք տիրոջից մեքենան խլել են հրազենի սպառնալիքով կամ առևանգել մեքենաները ավտոլվացման կետերից ու օդանավակայանների կայանատեղիներից: Խմբավորումը գլխավորապես գործել է Նյու Ջերսիի հյուսիսում:
Մեքենաներն ուղարկվել են Արևմտյան Աֆրիկա, որտեղ վաճառվել են հարուստ մարդկանց այն գնով, որը զգալիորեն գերազանցում է ամերիկյան շուկայական գինը:
Ոստիկանները հայտնաբերել են ընդհանուր 8 մլն դոլար արժողությամբ լյուքս դասի 160 մեքենաներ: Դրանց մեծ մասը գտնվել են Նյու Յորքի և Նյու Ջերսիի նավահանգիստներում:
Հանցագործների մեծ մասը այդ երկու նահանգների բնակիչներ են: Մեքենաների առևանգման և փողերի լվացման համար նրանց սպառնում է 20 տարվա ազատազրկում:
