«Սպայկա» ընկերության տնօրենի ձերբակալությամբ պայմանավորված աղմուկը, կարծես թե, չի դադարում։ Երեկ ընկերությունը հայտարարություն է տարածել, որում, մասնավորապես, նշել է, որ վերջին զարգացումների արդյունքում ծագած ֆինանսական խնդիրների պատճառով որոշ մարզերում և որոշ տնտեսվարողներից մթերումներ չեն իրականացնելու։ Ընկերությունը, այնուամենայնիվ, հորդորել է՝ այս հայտարարությանը քաղաքական աստառ չտալ և այն չդիտարկել որպես սաբոտաժի փորձ։
Հասարակությունը, կարծես թե, միանշանակ չընդունեց այս իրողությունը, ինչպիսի՞ մեկնաբանություն կտայիք «Առաջին լրատվական»-ի հարցին «Իմ քայլը» խմբակցության պատգամավոր, իրավաբան Նիկոլայ Բաղդասարյանը պատասխանեց․ «Այստեղ պետք է նշեմ, որ անձը ոչ թե կարգազանցություն է կատարել, այլ նա մեղադրվում է հանցագործության մեջ։ Իսկ թե ինչու նրան ձերբակալեցին, իսկ մյուսին ոչ, ապա պետք է ասեմ, որ յուրաքանչյուր դեպքում դատարանն է որոշում գրավով փոխարինե՞լ, թե՞ ոչ»։
Իսկ «Քաղաքացու որոշում» սոցիալ-դեմոկրատական կուսակցության գործադիր մարմնի քարտուղար Սուրեն Սահակյանն էլ ասաց․ «Տեսանյութը դիտելով՝ ես հասկանում եմ, որ «Սպայկան» մեծ կազմակերպություն է, որն ունի տնօրեններ, ու երբ դրանցից մեկին հանում ես, եթե դա սաբոտաժ չի, ապա ի՞նչ է, որ սկսում ես չմթերել։ Ես կարծում եմ, որ դա կառավարության կամ դատական համակարգի վրա քաղաքական ճնշման փորձ է, որպեսզի կայացնեն իրենց ուզած որոշումը։ Այս իրավիճակը ստեղծվել է, որովհետև «Սպայկան» նախկին համակարգի հետ համագործակցելով՝ մենաշնորհ է դարձել․ իրենից կախվածություն ունեն և՛ գյուղացիները, և՛ կառավարությունը, և՛ ընդհանրապես տնտեսությունը»։
Մանրամասները՝ տեսանյութում։