Իտալիայի հյուսիսում գտնվող Սուզայի հովտում գերարագընթաց երկաթգիծ կառուցելու դեմ բողոքող ցուցարների և ոստիկանության միջև տեղի ունեցած բախման հետևանքով տուժել է ավելի քան 200 մարդ, որոնց մեծամասնությունը ոստիկանության ներկայացուցիչներ են:
Ինչպես հայտնում է France Presse գործակալությունը՝ հղում անելով ոստիկանության հայտնած տեղեկություններին, վնասվածքներ է ստացել իրավապահ մարմինների ավելի քան 188 ներկայացուցիչ և միտինգի տասնյակ մասնակիցներ:
Ձերբակալվել է առնվազն 5 մարդ:
Գործակալության տվյալներով՝ բախումները տեղի են ունեցել ամբողջ կիրակի օրվա ընթացքում: Ոստիկանությունն օգտագործել է արցունքաբեր գազ, իսկ ցուցարարները՝ քարեր և «մոլոտովի կոկտեյլներ»: Բացի այդ, ցուցարարների մի խումբ փորձել է գրոհով վերցնել մի տարածք, որտեղ նախապատրաստական աշխատանքներ են տարվում թունելի կառուցման համար:
Նշվում է, որ հարձակվողների երեսները փակ են եղել:
Ոստիկանությունն ամբողջ պատասխանատվությունը դրել է Իտալիայի և եվրոպական մյուս երկրների ձախ ծայրահեղականների վրա:
Միտինգի կազմակերպիչներն իրենց հերթին նշել են, որ տասնյակ հազարավոր մարդիկ հավաքվել էին հովտում, որպեսզի խաղաղ ցույց իրականացնեին, սակայն մի առանձին խումբ անջատվել է և սկսել հարձակումը փակ տարածքի վրա, որտեղ իրականցվում է շինարարությունը: Այդ տարածքը պահպանում էին մի քանի հարյուր ոստիկաններ:
Սուզայի հովտում բողոքի ակցիաները սկսվել են հունիսի վերջին: Մասնավորապես՝ հունիսի 27-ին բախումների հետևանքով տուժել է 25 ոստիկան և 4 ցուցարար: Միլանն ու Փարիզը կապող գերարագ երկաթուղու կառուցման համաձայնությունը Ֆրանսիայի և Իտալիայի միջև կայացվել է դեռևս 2001 թ.: 58 կմ երկարություն ունեցող թունելի շինարարությունը (12 կմ անցնում է Իտալիայի տարածքով) պետք է սկսվի 2013 թ. և շահագործման հանձնվի 2023 թ.:
Սուզայի հովտում գտնվող մի քանի բնակելի թաղամասերի բնակիչները բողոքում են շինարարության դեմ՝ պատճառաբանելով, որ այն կվնասի շրջակա միջավայրին:
