Հարավային Կորեան դարձել է աշխարհի առաջին երկիրը, որը սկսել է հինգերորդ սերնդի շարժական կապի (5G) առևտրային շահագործումը: Ինչպես ապրիլի 4-ին հայտնել է գիտության և տեղեկատվական-հաղորդակցական տեխնոլոգիաների նախարարությունը, SK Telecom, KT և LG Uplus հեռահաղորդակցական ընկերություններն սկսել են այդ ստանդարտի շարժական կապի ծառայություններ տրամադրել քաղաքացիներին:
Հինգերորդ սերնդի շարժական կապը (5G) ավելի մեծ թողունակություն է ապահովում: Տվյալների հաղորդման ռեկորդային արագությունը հասել է 25 Գբ/վ-ի: Այդ ցուցանիշները թույլ են տալիս առցանց ռեժիմով տեսանյութ հեռարձակել 8K (Ultra HD) լուծաչափով:
Առաջին երկիրը, որը թեստային ռեժիմով գործարկել է շարժական կապի հինգերորդ սերունդը, Շվեդիան է: Սակայն հինգերորդ սերնդի առևտրային ցանցն այդ երկրում կսկսի գործել 2021թ.-ից ոչ շուտ, հաղորդել է ՏԱՍՍ:
