Եվրամիությունն Առևտրի համաշխարհային կազմակերպությունում գործ է սկսել Հնդկաստանի և Թուրքիայի դեմ։ Առաջինի պատճառը տեղեկատվական և հեռահաղորդակցական տեխնոլոգիաների արտադրանքի ներկրման ապօրինի մաքսատուրքերն են։ Թուրքիայի պարագայում պատճառը դեղորայքի նկատմամբ տեղական օրենսդրությունն է։ ԵՄ հաղորդագրությունում նշվում է, որ մեկ տարում Միության ընդհանուր կորուստն առնվազն 1 մլն եվրո է գնահատվում։
Չնայած որ ԱՀԿ-ում Հնդկաստանը պարտավորություն է ստանձնել մաքսատուրքեր չգանձել բջջային հեռախոսներից, ինչպես նաև դրանց բաղադրիչ տարրերից, բազային կայաններից, ինտեգրալ համակարգերից և օպտիկական սարքերից՝ երկիրը 7․5-20 տոկոսի չափով մաքսատուրքեր է կիրառում։
Թուրքիայի դեմ գործը վերաբերում է միջոցառումներին, որոնք արտասահմանյան դեղագործական ընկերություններին պարտավորեցնում են արտադրությունը երկիր տեղափոխել, եթե նրանք ցանկանում են, որ իրենց դեղորայքը սպառողների համար փոխհատուցման իրավունք ունենա՝ թուրքական առողջապահական համակարգի շրջանակում։ Բացի այդ, Անկարան մի շարք միջոցառումներ է կիրառում տեխնոլոգիաների փոխանցման հարցերում այն դեպքերում, երբ ընկերություններն արտադրությունը Թուրքիա են տեղափոխում։
Կարգավորման առաջին քայլը բաղկացած է 60-օրյա խորհրդակցություններից։ Եթե դրանք ապարդյուն անցնեն, ԵՄ-ն կարող է պահանջել, որ ԱՀԿ-ն նշված հարցերի շուրջ որոշում կայացնելու համար խումբ ձևավորի։
