2020 թվականի Եվրոպայի առաջնության ընտրական փուլի մեկնարկում Հայաստանի ազգային հավաքականի կրած երկու պարտությունները էլ ավելի խորացրին հիասթափությունը: Շարունակվում է խոսվել ազգային թիմի կազմը փոփոխելու, նոր կադրերով համալրելու մասին: Հավաքականի գլխավոր մարզիչ Արմեն Գյուլբուդաղյանցն էլ շարունակ կարևորում է սերնդափոխության նշանակությունն ու գործընթացը: «Մենք դեռ անցած տարի նշել էինք, որ մեր հավաքականը երիտասարդացման կարիք ունի։ Արդեն հինգ ֆուտբոլիստ նորամուտն է նշել հավաքականում։ Կփորձենք մեր ունեցած լավագույն երիտասարդներին ընդգրկել կազմ, որ լավ արդյունք ստանանք»,- Ֆինլանդիայից կրած պարտությունից հետո ասել էր Գյուլբուդաղյանցը։ Ազգերի լիգայի խաղարկությունում ազգային թիմում նորամուտը նշեցին, «Փյունիկի» պաշտպան Արմեն Մանուչարյանը, Արթուր Քարտաշյանը, կիսապաշտպան Ալիկ Առաքելյանը և «Ալաշկերտի» դարպասապահ Հենրի Ավագյանը:
Արդեն Եվրո-2020-ի ընտրական փուլում, Ֆինլանդիայի դեմ մրցավեճում էլ առաջին անգամ ազգային հավաքականի մարզաշապիկը կրեց «Արարատ-Արմենիայի» ներկայացուցիչ Պետրոս Ավետիսյանը: Ինչպե՞ս գնահատել նշված ֆուտբոլիստների նորամուտը: Արմեն Մանուչարյանը Լիխտենշտեյնի դեմ Երևանում տեղի ունեցած խաղի առաջին կեսում վնասվածք ստացավ և փոխարինվեց: Հենրի Ավագյանը Լիխտենշտեյնի հետ արտագնա խաղում կոպիտ սխալ թույլ տվեց և գնդակ ընդունեցինք: Նույն խաղում Ալիկ Առաքելյանը փոխարինման դուրս եկավ միայն հանդիպման 88-րդ րոպեին և նրա ցուցադրած խաղի վերաբերյալ դժվար է կարծիք հայտնելը: Ֆինլանդիայի դեմ մրցավեճում Պետրոս Ավետիսյանը 74-րդ րոպեին փոխարինեց Էդգար Բաբայանին: Ի՞նչ կարելի է ասել Ավետիսյանի նորամուտի մասին: Այն, որ նա ոչնչով չտպավորեց, կարծում ենք պարզ է: Թերևս Արթուր Քարտաշյանն է, որին հաջողվեց նորամուտի խաղում դառնալ գոլի հեղինակ: Ջիբրալթարի հետ արտագնա մրցավեճում Քարտաշյանը խփեց մեր հավաքականի 5-րդ գոլը: Բոսնիա-Հերցեգովինայի և Ֆինլանդիայի հետ հանդիպումներում սակայն Քարտաշյանը տեղ չէր գտել Արմեն Գյուլբուդաղյանցի ցուցակում: Ալիկ Առաքելյանն էլ թեև հրավիրվել էր հավաքականը սակայն տեղ չգտավ վերջին երկու խաղերի հայտացուցակում: Վերջին 6 հանդիպումներում Գյուլբուդաղյանցը 90 տոկոսով ապավինել է այսպես ասած հին կադրերին և խաղերը կառուցել նրանց միջոցով: Հավաքականի վերջին տարիների առաջատարները կապված տարիքի հետ այլևս այն չեն: Նոր կարդրերով համալրվելն իսկապես անհրաժեշտությունը է թվում, բայց․․․:
Ի՞նչ անել, որտեղի՞ց գտնել որակյալ ֆուտբոլիստների: Ցավոք այս հարցի պատասխանն ակնհայտ է և սպառիչ որակյալ․ կադրեր չունենք: Փորձենք պատկերացնել, թե ինչ վտանգավոր երևույթ է տեղի ունենում Ազգային հավաքականում: Ժամանակին մեր հավաքականի բռունցքը կազմում էին Հենրիխ Մխիթարյանը, Մարկոս Պիզելին, Արաս Օզբիլիսը, Կառլեն Մկրտչյանը, Գևորգ Ղազարյանը, Յուրա Մովսիսյանը: Նրանք այսօր էլ ազգայի թիմի խաղացողներն են և պարբերաբար խաղում են: Նրանց առկայության պարագայում սակայն մեր հավաքականը այսօր խաղում մի քանի անգամ ավելի վատ: Եվ որ ամենացավելին է, նրանց ժամանակ առ ժամանակ փոխարինող ֆուտբոլիստները խաղում են էլ ավելի վատ: Ֆինլանդիայի դեմ խաղում Օզբիլիսի փոխարինումից հետո մեր հավաքականի խաղը էլ ավելի ռեգրես ապրեց: Մեր երիտասարդ ֆուտբոլիստներից ո՞վ կարող է փոխարինել ասենք նույն Օզբիլիսին, Գևորգ Ղազարյանին կամ որակապես նրանց ցուցադրած ֆուտբոլի գոնե մոտ խաղ ցուցադրել: Այս հարցին ևս կարելի է պարզել և ակնհայտ պատասխան տալ, ոչ ոք:
Ո՞ւր են տղերքը, որոնք պետք է առաջ մղեն Հայաստանի ազգային հավաքականին: Վտանգավոր այս երևույթը կանգնեցնել այսօր կարծես անհնարին է թվում: Տխուր է պատկերացնել թե ինչ հավաքական ենք ունենալու մի քանի տարի անց, երբ Օզբիլիսը, Մխիթարյանը կամ Գևորգ Ղազարյանն ընդհանրապես չխաղան: Ռուբեն Հայրապետյանի գլխավորությամբ հատկապես մանկապատանեկան ֆուտբոլն այն աստիճան է դեգրադացվել, որ այսօր չունենք գեթ մեկ կադր, որը կհայտնվի գոնե Եկատերինբուրգի «Ուրալում», կամ Սամարայի «Կռիլիյա Սովետովում»:
Դիտելով մեր պատանեկան հավաքականների ելույթները կարող ենք ասել, որ նման կադրեր չենք ունենա նաև առաջիկա 5-6 տարիներին: Իրավիճակն իսկապես տխուր և անհուսալի է: