Միացյալ Նահանգների կողմից Գոլանի բարձունքները որպես Իսրայելի տարածք ճանաչելու Թրամփի մտադրությունը բավականին մեծ իրարանցում է առաջացրել միջազգային հանրության շրջանակներում, և քննարկումների լուրջ տեղիք է տվել։
Որոշ երկրներ շտապեցին նշել, որ Իսրայելի գործողությունները օրինականացնելու Թրամփի փորձերը հակասում են միջազգային իրավունքին, իսկ փորձագիտական շրջանակները նշում են, որ սա առավել քան ակնկալելի էր՝ եթե հաշվի առնենք, որ առ ժամանակ առաջ Թրամփը Իսրայելի մայրաքաղաք ճանաչեց Երուսաղեմը։ Այդպե՞ս է արդյոք, և սա ի՞նչ հետևանքներ կարող է ունենալ տարածաշրջանային միջազգային դիվանագիտության համատեքստում «Առաջին լրատվական»-ի հարցին Ժնևի համալսարանի Միջազգային հարաբերությունների ֆակուլտետի դասախոս Վիգեն Չեթերյանը պատասխանեց․ «Այո, ես համաձայն եմ այդ թեզին, որ Թրամփի ղեկավարությունը շատ պրոիսրայելական քաղաքականություն կվարի։ Թրամփից առաջ էլ ամերիկացիները պրոիսրայելական քաղաքականություն էին վարում, բայց այստեղ արդեն ոչ մի տարբերություն չկա Իսրայելի և ԱՄՆ-ի Միջին Արևելքի քաղաքականության միջև»։
«Մի կողմից՝ Իսրայելը ռազմաքաղաքական առումով շատ մեծ ուժ է ամբողջ միջին Արևելքի տարածաշրջանում, և նրա նախկին թշնամիներն այսօր ջարդուփշուր են եղել՝ Սիրիան, Իրաքը, իսկ Եգիպտոսը շատ թույլ է, արաբական աշխարհը բաժանված է, և շատ հստակ է, որ այդ բալանսն այսօր հօգուտ Իսրայելի է։ Բայց եթե ավելի երկարաժամկետ առումով մտածենք, ապա ես գտնում եմ, որ այն շատ վտանգներ է պարունակում»,- հավելեց բանախոսը։
Մանրամասները՝ տեսանյութում։