Բրազիլիայում 15 ժամյա բարդ վիրահատության ընթացքում բաժանել են սերտաճած գլուխներով սիամական երկվորյակներին: 2-ամյա Իզաբել և Իզադորա Ֆրեյտասները Բրազիլիայի առաջին սերտաճած գլուխներով սիամական երկվորյակներն են:
Վիրահատությանը մասնակցել են ոչ միայն տեղացի մասնագետներ, այլև տարբեր երկրներից ժամանած բժիշկներ, այդ թվում հանրահայտ նեյրովիրաբույժ Ջեյմս Հուդրիչը, որն արդեն 9 նմանատիպ սիամական երկվորյակների է առանձնացրել:
Երեխաներին հնարավոր էր բաժանել, քանի որ նրանցից յուրաքանչյուրն իր սեփական ուղեղն ուներ:
Վիրահատությունը, նեյրովիրաբույժ Ջեյմս Հուդրիչի առաջարկով, կատարվել է փուլ առ փուլ. երեխաներին առանձնացրել են 4 տարբեր վիրահատությունների միջոցով:
Առաջին վիրահատությունը կատարվել է, երբ աղջիկները 18 ամսական էին. բրազիլիացի նեյրովիրաբույժ Ռիկարդո Օլիվյերան աշխատել էր աղջիկների գլուխների անոթների վրա: Երկրորդ և երրորդ վիրահատությունների ընթացքում վիրաբույժները մասնակի բաժանել էին աղջիկների գլուխները՝ այն տեղում, որտեղ նրանց ուղեղները գրեթե հպվում էին: Ամեն վիրահատությունից հետո աղջիկներն արագ և առանց որևէ բարդությունների վերականգնվում էին:
Ի վերջո, վերջին վիրահատության ընթացքում վիրաբույժները վերջնականապես բաժանել էին աղջիկներին և նրանցից յուրաքանչյուրին գանգի ռեկոնստրուկցիա արել:
Երեխաների ծնողները՝ Դեբորան և Դիեգոն խոստովանում են, որ աղջիկներին առանձին-առանձին գրկելն իսկական հրաշք է: Նրանք հույս նունեն, որ ապագայում աղջիկները կկարողանան նորմալ կյանք վարել, գրում է Daily Mail-ը:
