«Հայաստանին պետք չէ պետության գլուխ, ԱՄՆ-ի նման հզոր պետությունն ունի նախագահ, բայց ոչ պետության գլուխ»,- այսօր լրագրողների հետ հանդիպման ժամանակ հայտարարեց ԱԻՄ նախագահ Պարույր Հայրիկյանը:
ՀՀ սահմանադրության օրվան ընդառաջ ԱԻՄ նախագահը շնորհավորեց ՀՀ սահմանադրության օրը, որը, նրա խոսքով, դարձավ չափահաս: «1995 թվականի իշխանությունը` ՀՀՇ, սահմանադրություն գրեց իր առաջնորդի համար, իսկ այսօր այն բավարար ուշադրության չի արժանանում և լուրջ փոփոխությունների կարիք ունի»,- նշեց Պարույր Հայրիկյանը` հավելելով, որ սահմանադրության մի քանի դրույթների փոփոխված ամրագրումը ժողովրդավարություն կբերի երկրի քաղաքական կյանք:
Խոսելով սահմանադրական փոփոխությունների մասին` ԱԻՄ նախագահը մեկնաբանեց, որ ՀՀ սահմանադրության մեջ ամրագրված չէ ամենակարևոր կառույցի` Ազգային ժողովի ձևավորման կարգը` սա համարելով սահմանադրության բացթողումներից մեկը: «Պետք է փոխել Ռոբերտ Քոչարյանի և Անդրանիկ Մարգարյանի դավադրությունը ժողովրդավարության նկատմամբ, որը նրանք հաստատեցին խորհրդարանական ընտրությունները 5 տարին մեկ անգամ անցկացնելու որոշմամբ»,- ընդգծեց Պարույր Հայրիկյանը` նշելով, որ պետք է ամրագրեն իշխանությունների տարանջատման սկզբունքը:
Անդրադառնալով ղարաբաղա-ադրբեջանական խնդրին՝ Հայրիկյանը հայտնեց իր տեսակետը` ասելով, որ կողմ է արցախյան հարցի ցանկացած լուծման, որի դեպքում խնդրի կարգավորմանը կմասնակցեն նաև ԼՂՀ իշխանությունները: «Այսօր մենք ունենք թշնամական հարաբերություններ, որոնցում մեղավոր են նաև մեր աջակից պետությունները»,- նշեց ԱԻՄ նախագահը: Լրագրողների այն հարցին, թե ի՞նչ կարծիք ունի ՀԱԿ-իշխանություն երկխոսության մասին՝ նշեց, որ մեր ազգի ճակատագիրը այդ երկխոսությունից կախված չի եղել և չի էլ լինի:
