Հայաստանի Հանրապետությունը հանրային գերակա շահի շրջանակներում հիմա էլ սկսել է պայքարել Կոտայքի մարզի Արտավազ գյուղի գյուղացիների դեմ:
Գյուղի բնակիչներն առանց այն էլ 90-ականներին տուն-տեղ կորցրած, Ադրբեջանից տեղահանված փախստականներ են: Հիմա էլ հայրենի կառավարությունը, 2010 թ. փետրվարի 25-ի թիվ 241-Ն որոշմամբ, գյուղացիներին պատկանող հողերից 95.87549 հա հողի նկատմամբ ճանաչել է գերակա հանրային շահ` որպես ձեռք բերող ճանաչելով «Էյ ընդ Էմ Ռեյր» ՍՊԸ-ին: Հետաքրքիր է, որ այդ ընկերությունը հենց կառավարության որոշման օրն է ստեղծվել և միանգամից ձեռք բերելու դիմում ներկայացրել: Հանքային ջրերի արդյունահանման և շշալցման գործարան կառուցելու համար այս ընկերությանը անհրաժեշտ է եղել 1300 հա հող, սակայն դրանով նրանք չեն բավարարվել և գյուղացիների հողերից են տվել ընդհանուրը 95.87549 հա հող` չունենալով ներդրումային ծրագիր:
Գյուղացիները սկսել են վիճարկել կառավարության որոշումը, սակայն հաջողության չեն հասել: Հողերը ձեռք բերող ընկերությունը հայցեր է ներկայացրել հողերի սեփականատերերի դեմ և շահել դատական վեճերը: Տուժածների առաջին դիմումն արդեն Եվրադատարանում է: Այդ մասին հրավիրված ասուլիսում տեղեկացրին գյուղի բնակիչների փաստաբանները:
