Առաջին վեց ամսիներին բռնկված հրդեհների վիճակագրությանն անդրադառնալով՝ Հրդեհային տեսչության քարոզչության բաժնի պետ Սերգեյ Հայրապետյանը ասաց, որ մոտ 9% աճ ունենք, որը կապված է հունիս ամսվա կանաչապատ տարածքների հրդեհների հետ. «Զոհերը 8-ն են, 18 մարդ ստացել է վնասվածքներ»։
Հրդեհների վնասի հաշվարկման արդյունքներից խոսելով՝ Հայրապետյանը նշեց, որ նյութական վնասը կես տարվա կտրվածքով հասնում են 100 մլն դրամի՝ նախորդ տարվա 85 մլն-ի փոխարեն։ Սերգեյ Հայրապետյանի պնդմամբ՝ հրդեհների 90%-ից ավելին մարդկային գործոնի արդյունք են. «Երեխաները շատ հաճախ դիտավորյալ այրում են և կանգնում նայում՝ ինչպես են հրշեջները հանգցնում»։
Խոսելով դիտավորյալ հրդեհների դեպքում սահմանվող պատժամիջոցների մասին՝ Հրդեհային տեսչության քարոզչության բաժնի պետն ասաց, որ դրանք իրավապահ մարմիններն են սահմանում։
Վտանգներից խուսափելու համար Սերգեյ Հայրապետյանը կոչ արեց ոչ միայն քաղաքացիներին, այլ նաև հիմնարկներին ու գործարաններին իրենց տարածքներում առկա խոտերը ժամանակին հնձել, որպեսզի չչորանան և հրդեհի պատճառ չդառնան, ապա հավելեց. «Պետք է շատ զգույշ լինել բնության գրկում հանգստանալիս, մարդիկ պետք է հետևեն իրենց վառած խարույկներին»։
Հարցին, թե որքանով են հրշեջ մեքենաները ջրով ապահովված, ԱԻՆ փրկարար ուժերի վարչության պետի տեղակալ Պավել Գյոզալյանն ասաց. «Բացառվում է, որ հրշեջ ավտոմեքենան առանց ջրի հայտնվի դեպքի վայրում։ Ցանկացած մարդ օրվա ցանկացած ժամին կարող է ներկայանալ ցանկացած ջոկատ և նայել մեքենաների ջրով ապահովված լինելը»։
Ըստ ԱԻՆ ծառայության տվյալների՝ անցյալ տարվա 829 մեկնման փոխարեն այս տարի 1191 մեկնում է իրականացվել համպատասխան հրդեհի վայրեր։
