«Որտեղի՞ց է նախագահ Պուտինը վերցրել 50 մլրդ դոլարն Օլիմպիական խաղերի համար»՝ հարցադրում է կատարում The Financial Times-ն ու առաջարկում պատասխանը փնտրել Ուկրաինայի, Գերմանիայի ու «Գազպրոմի» այլ հաճախորդների մոտ, ովքեր գազի համար ուռճացված գներ են վճարել:
Գազի արտահանումից ստացված եկամուտները թույլ տվեցին Վլադիմիր Պուտինին ավելի ագրեսիվ արտաքին քաղաքականություն իրականացնել և ֆինանսավորել պատմության մեջ ամենաթանկ Օլիմպիական խաղերը՝ գրում է պարբերականը:
Բարաք Օբամայի նախագահությանը մնացած տարիներին ընդառաջ՝ հայտնվել է խաղի կանոնները փոխելու հնարավորություն՝ վստահեցնում է գործարար պարբերականը: ԱՄՆ-ը «Գազպրոմ» չունի, սակայն ԱՄՆ էներգետիկ հեղափոխությունը թույլ կտա մեղմացնել Ռուսաստանի ճնշումը հարևանների վրա: Թերթաքարային ապարի հիդրավլիկ ճեղքման տեխնոլոգիայի շնորհիվ ԱՄՆ-ում բնական գազի գինը վերջին 5 տարում ընկել է և դարձել 70 տոկոսով էժան այն գնից, որը «Գազպրոմը» պահանջում է իր հաճախորդներից:
Ինչպես գրում է FT-ն, ԱՄՆ-ում թերթաքարային գազի պաշարներն այնքան մեծ են, որ Ամերիկան շուտով կդառնա բնական գազի Սաուդյան Արաբիա, իսկ ապագայում նավթի արդյունահանմամբ նրանից առաջ կանցնի:
Օբամայի վարչակազմն արդեն հավանություն է տվել արտահանման համար հեղուկացված գազի 6 տերմինալների շինարարությանը: Նույնիսկ հաշվի առնելով հեղուկացման և փոխադրման արժեքը՝ ամերիկյան գազը միևնույն է՝ զգալիորեն էժան կլինի ռուսականից:
Այժմ ԱՄՆ-ն ունի ողջ աշխարհում էներգակիրների գներն իջեցնելու հնարավորություն, եթե Օբաման թույլ տա ամերիկյան էներգետիկ հեղափոխությանը հաղթարշավ իրականացնել աշխարհում: