«Այդ հարցը դեռ քննարկման փուլում է, և բավական թեժ քննարկումներ են գնում, ընդ որում՝ երկու կողմի փաստարկներն էլ հիմնավոր են»,- «Առաջին լրատվական»-ի հետ զրույցում ասաց «Իմ քայլը» խմբակցության պատգամավոր Հայկ Գևորգյանը՝ անդրադառնալով ոչ ալկոհոլային՝ 5 տոկոսից ավելի շաքարայնություն ունեցող զովացուցիչ ըմպելիքների վրա դրվելիք ակցիզային հարկին:
Ներկայացնելով հնչեցվող փաստարկները՝ նա նշեց, որ ինքն իր համար դեռ չի որոշել՝ որն է ճիշտ. «Միանշանակ ասել, որ դա շատ վատ է, ես չեմ կարող ասել, բայց միանշանակ ասել, որ դա անհրաժեշտ է, դարձյալ չեմ կարող ասել»:
Անկախ Հարկային օրենսգրքում կատարվող փոփոխություններից՝ Հայկ Գևորգյանը մնում է իր կարծիքին. «Հայաստանին պետք է լրիվ նոր կոնցեպցիայով, նոր տեսլականով, նոր նպատակներին մղված Հարկային օրենսգիրք: Դա սկզբունքորեն կարելի է անել նաև գործող Հարկային օրենսգրքի փոփոխություններով, բայց այդ փոփոխություններն այնքան մեծ կլինեն, որ, կարծում եմ, անհրաժեշտություն կառաջանա վաղ թե ուշ ընդունել նոր օրենսգիրք՝ շատ ավելի պարզ, շատ ավելի հասկանալի, շատ ավելի կանխատեսելի բիզնեսի համար և պետության եկամուտների հավաքագրման առումով»:
Վարչապետի՝ Իրան կատարած հարցի առնչությամբ էլ Հայկ Գևորգյյանն ասաց. «Հայաստանի և Իրանի միջև հարաբերությունները որևէ քաղաքական խոչընդոտ բացարձակապես չունեն, և խնդիրը զուտ տեխնիկական հարթության վրա է: Հայ-իրանական հարաբերությունների վրա որոշակի ազդեցություն կարող է ունենալ այն, որ Հայաստանի՝ որոշումներ կայացնելու սուվերենությունը էականորեն աճել է»:
Առավել մանրամասն՝ տեսանյութում:
