Փետրվարի 19-ին մեծ շուքով նշվեց Հովհաննես Թումանյանի 150-ամյակը: Դեռևս այն ժամանակ Հովհ. Թումանյանը այսպիսի միտք է արտահայտել, որ երբ հասարակությունը խոսում է գրականության, հոգևորականության կամ մամուլի մասին, ուրիշ այլ որակումներ չի տալիս, քան «մեր աղքատիկ գրականությունը», «մեր ընկած հոգևորականությունը» և «մեր կեղտոտ մամուլը»: «Առաջին լրատվական»- ի հետ զրույցում անդրադառնալով այս դիտարկմանը՝ Հայ առաքելական եկեղեցու Տավուշի թեմի առաջնորդ Բագրատ եպիսկոպոս Գալստանյանը նշեց. «Մեր խնդիրը ոչ թե անդրադառնալն ու անցնելն է, այլ փորձել վերաքննել մեզ, եկեղեցում դա կոչվում է ապաշխարություն, երջանիկ փոփոխություն: Պետք է հոգևոր մերկությամբ, չվախենալով՝ գնահատական տալ և անցնել առաջ՝ դեպի զարգացում, դեպի փոփոխություն: Որևէ ժամանակի համար գնահատական տալուց բացի, պետք է վերաքննել, վերատեսության ենթարկել և դասեր քաղել: Մեծ մտավորականի, մեծ հայի խոսքերը մղում են խորհելու, թե ինչպիսին է մեր կյանքը»:
Անդրադառնալով հարցին, թե եկեղեցին ինչ ազդակներ է ստանում հանրությունից, Բագրատ եպիսկոպոս Գալստանյանը նշեց. «Եկեղեցին բաժանված չէ հանրությունից, առանձին սոցիալական խավ չէ: Տարբեր ազդակներ են գալիս: 21-րդ դարը թիրախավորման ժամանակաշրջան է, հոգևոր կյանքի, կրոնի, եկեղեցու նկատմամբ մարտահրավերների դար է, մտածողության փոփոխության ժամանակաշրջան է, շատ մտածողներ համարում են աստվածսպանության, հոգեսպանության, ինքնասպանության ժամանակաշրջան: 21-րդ դարը տնտեսական մարդ ստեղծելու, մարդուն տնտեսական արժեքներով գնահատելու, հոգևոր կյանքի նվազման ժամանակաշրջան է. այդ ազդակների մեջ ենք դիտարկում կյանքը: Եկեղեցին և ընտանիքն այն համայնքային միավորներն են, որոնց 21-րդ դարը չի սիրում՝ չի սիրում անհատապաշտության, եսապաշտության մտածողության ծիրից դիտարկելով: Մարդու ինքնամեկուսացման ժամանակահատված է… Եկեղեցին անմասն չէ այդ ազդակներն ստանալուց և փորձում է լուծումներ գտնել: Եկեղեցին մշտապես փորձում է իր խոսքը հասանելի դարձնել»:
Մեր զրուցակիցը նաև ընդգծեց, որ մեր եկեղեցին կացնահարված ժառանգություն ունի, և պետք է կարողանալ վերադարձնել համայնքային դիմագիծը:
Մանրամասն՝ տեսանյութում: