Բրիտանացի 7 պատգամավորների լեյբորիստական կուսակցության շարքերը լքելու փաստն անհանգստացնող ազդանշան է կուսակցության համար, խմբագրական սյունակում գրում է բրիտանական The Guardian պարբերականը:
Այս շաբաթ պատգամավորները հայտարարել են կուսակցությունը լքելու մասին՝ լեյբորիստների առաջնորդ Ջերեմի Քորբինի նկատմամբ դժգոհության պատճառով: Մասնավորապես, պատգամավորները համաձայն չեն Brexit-ի հարցում նրա մոտեցմանը: Բացի այդ, նրանք դեմ են լեյբորիստների հակասեմիտական տրամադրություններին, գրում են բրիտանական լրատվամիջոցները: Կուսակցությունը լքել են Քրիս Լեսլին, Մայք Հեյփսը, Լուսիանա Բերգերը, Գեվին Շեքերը, Չուք Ումունեն, Անժելա Սմիթը, Էն Քոֆին: Նրանք կմնան խորհրդարանում, բայց կաշխատեն որպես անկախ խումբ:
Ինչպես նշում է պարբերականը, նրանց հեռանալը նշանակում է, որ կուսակցությունը վտանգի տակ է դրել լեյբորիստական կուսակցության ղեկավարությամբ ձախ ուժերի «երկարաժամկետ կոալիցիան»: Պարբերականը նրանց հեռանալը համարում է «սխալ, բայց նաև նախազգուշացում»:
Լեյբորիստական կուսակցությունը վաղուց աշխատավորների և տարբեր սոցիալիստական ու սոցիալ-դեմոկրատական ավանդույթների կոալիցիա էր:
Վերջին հարյուրամյակում Բրիտանիան արմատական փոփոխություններ է կրել, որոնք մարտահրավեր են ցանկացած կուսակցության համար՝ գոյատևելու կամ ոչնչանալու: Այնուամենայնիվ, պարբերականը զանգվածային հրաժարականների մեջ լուրջ մասշտաբներ չի տեսնում: Պարբերականը նշում է, որ դա, ավելի շուտ, կուտակված անձնական հուսահատության արդյունք է, և ոչ թե կոլեկտիվ քաղաքական անհնազանդության պահ:
