Ամերիկան ներկայացնող հայտնի բռնցքամարտիկ Վանես Մարտիրոսյանը նախօրեին հայտարարեց կարիերան ավարտելու մասին: Մարտիրոսյանը միջին քաշային կարգում աշխարհի չեմպիոնի կոչման հավակնորդ էր: 32-ամյա հայ բռնցքամարտիկը պրոֆեսիոնալ ռինգում անցկացրել է 41 մենամարտ, որոնցից 36-ում հաղթանակ տարել, մեկ մենամարտ ավարտել ոչ-ոքի և կրել 4 պարտություն:
Երկրպագուների համար անսպասելի որոշումից հետո Մարտիրոսյանը հայտարարել է, թե ինչն է ռինգից հեռանալու գլխավոր պատճառը: «Հասկանում եմ, որ շատերի համար որոշումս անսպասելի էր և հիասթափեցնող: Ինձ համար ևս դժվար է հեռանալ բռնցքամարտից, բայց կյանքում լինում են նաև ծանր դրվագներ, որոնց հետ պետք է համակերպվել: Ես պայմանագիր էի կնքել լեգենդար Դոն Քինգի հետ՝ հույս ունենալով մենամարտել և նոր հաղթանակներ կերտել: 2 տարվա ընթացքում ես անցկացրի ընդամենը մեկ մենամարտ՝ մրցելով Գենադի Գոլովկինի հետ: Ավելին, մենամարտից միայն 2 շաբաթ առաջ ինձ հայտնեցին, որ պետք է ռինգ դուրս գամ: Դա նախապես մտածված քայլ էր, որի նպատակը ինձ հարված հասցնելն էր: Այնուամենայնիվ, ես համաձայնեցի մենամարտել, քանզի սիրում եմ մենամարտել: Ես չվախեցա և առանց պատրաստվելու արեցի հնարավորը հաղթելու համար: Դոն Քինգը «սպանեց ինձ», սպանեց երազանքներս»,- հայտարարել է Մարտիրոսյանը:
Նշենք, որ Գոլովկինը բռնցքամարտի WBA-ի, WBC-ի, IBF-ի և IBO-ի վարկածներով աշխարհի չեմպիոն է: Նա ղազախական բռնցքամարտի կենդանի լեգենդ է, որը պրոֆեսիոնալ ռինգում անցկացնելով 39 մենամարտ՝ տարել է 38 հաղթանակ, որոնցից 34-ը՝ նոկաուտով:
Դեռևս մենամարտից առաջ մամուլը գրում էր, որ Դոն Քինգը, նվեր մատուցելով Գոլովկինին, ցանկանում է ոչնչացնել Վանես Մարտիրոսյանին: Ավելի ստույգ՝ բոլորի համար պարզ էր, որ հայ բռնցքամարտիկը ի զորու չէ առանց պատշաճ նախապատրաստության դիմադրել մրցակցին: Արդեն 3-րդ ռաունդում Գոլովկինը նոկաուտի էր ենթարկել Մարտիրոսյանին՝ պաշտպանելով չեմպիոնի տիտղոսը:
Նշենք, որ Մարտիրոսյանը կարիերայի ընթացքում առաջին անգամ էր նոկաուտի ենթարկվել: Կարելի է ասել, որ Դոն Քինգը մեկ մենամարտով խաչ քաշեց Մարտիրոսյանի կարիերայի վրա: Նշենք, որ պրոմոութեր Քինգը պրոֆեսիոնալ բռնցքամարտի ամենահայտնի ֆիգուրներից մեկն է: Նա եղել է այնպիսի բռնցքամարտիկների պրոմոութեր, ինչպիսիք են՝ Լենոքս Լյուիսը, Լարի Հոլմսը, Էվանդեր Հոլիֆիլդը: Ներկայում էլ Քինգը համագործակցում է ամենահայտնի բռնցքամարտիկների հետ:
Միևնույն ժամանակ Քինգը հայտնի է որպես մեծ «աֆերիստ»: Նա բազմիցս ֆինանսական պարտավորությունները չի կատարել բռնցքամարտիկների նկատմամբ, ինչի հետևանքով դատարանի որոշմամբ նրանից գումարներ են բռնագանձվել: Նրան անվանում են ամերիկյան բռնցքամարտի կնքահայրը:
1982 թվականին լեգենդար բռնցքամարտիկ Մուհամեդ Ալին հայց էր ներկայացրել Քինգի դեմ՝ պնդելով, որ պրոմոութերը չի վճարել Լարի Հոլմսի հետ մենամարտի պարգևավճարը, որը կազմել է 1.1 միլիոն դոլար: Ըստ ամերիկյան ԶԼՄ-ների՝ Քինգը կապ է հաստատել Ալիի մտերիմ ընկերներից՝ Ջերեմի Շաբազի հետ: Քինգը Շաբազին է տվել ճամպրուկ, որում եղել է 50 հազար դոլար, և նամակ, որտեղ Ալիի հայցը հետ վերցնելու մասին փաստաթուղթ է եղել: Ըստ Շաբազի՝ Ալին, որը վատառողջ է եղել, ստորագրել է փաստաթուղթը և վերցրել 50 հազար դոլարը:
Պրոմոութերական գործունեության ընթացքում Դոն Քինգը կազմակերպել է 500 չեմպիոնական մենամարտեր, ինչը ֆանտաստիկ ցուցանիշ է: Այսօր յուրաքանչյուր պրոֆեսիոնալ բռնցքամարտիկ երազում է համագործակցել Քինգի հետ: Թե ինչու լեգենդար բռնցքամարտիկը «սպանեց» Վանես Մարտիրոսյանի կարիերան՝ դժվար է ասել:
Նշենք, որ Մարտիրոսյանը միջին քաշային կարգում ԱՄՆ ամենահայտնի բռնցքամարտիկներից մեկն էր, որը ուներ երկրպագուների մեծ բանակ նաև աշխարհի տարբեր անկյուններում: Հայաստանում ծնված Մարտիրոսյանը ԱՄՆ է տեղափոխվել մանուկ հասակից: 2004-ին նա ԱՄՆ ազգային հավաքականի կազմում ելույթ է ունեցել Աթենքում տեղի ունեցած Օլիմպիական խաղերում: Արդեն 19 տարեկանում Մարտիրոսյանը սկսել է պրոֆեսիոնալ բռնցքամարտիկի կարիերան:
«Դոն Քինգի հետ պայմանագիր կնքելը կյանքիս կարևորագույն դրվագներից մեկն է: Ես երջանիկ եմ, միևնույն ժամանակ՝ հուզված: Վստահ եմ, որ Քինգը կարիերաս կտանի ճիշտ ուղղությամբ, և ես վերջապես կիրականացնեմ երազանքս ու կդառնամ աշխարհի չեմպիոն: Ես շնորհակալ եմ Քինգին նման հորիզոն բացելու համար»,- նման հայտարարություն Վանես Մարտիրոսյանն արել էր երկու տարի առաջ Քինգի հետ պայմանագիր կնքելուց հետո:
Նշենք նաև, որ Քինգին իր երազանքները սպանելու մեջ մեղադրելուց առաջ՝ փետրվարի 4-ին, Մարտիրոսյանը հանդես էր եկել մեկ այլ հայտարարությամբ. «Ես հեռանում եմ բռնցքամարտից։ Շնորհակալություն Դոն Քինգին։ Ես դեռ շատ բան կարող եմ տալ այս մարզաձևին: Հիմա Դոն Քինգի շնորհիվ աշխատելու եմ որպես մարզիչ»:
