«Առաջին լրատվական»-ի տեղեկություններով` վերջին շրջանում լարվել են ԱԺ ՀՀԿ-ական պատգամավոր Սամվել Ֆարմանյանի և քաղաքապետ Տարոն Մարգարյանի հարաբերությունները՝ պայմանավորված ԱԺ նախկին պատգամավոր, ՀՀԿ-ական Ռուբեն Հայրապետյանի անձով: Հայտնի է, որ Հայրապետյանը համարվում է Ֆարմանյանի հովանավորը: Իսկ նրա ու քաղաքապետի ջրերը նույն առվով չեն հոսում:
Երկու ՀՀԿ-ականների հարաբերությունների լարվածությունն այնքան է խորացել, որ բանը հասել է կենցաղային հարցերին: Ավելի կոնկրետ` ժամանակին չի իրականացվում Նոր-Նորքի 9-րդ զանգվածում գտնվող այն շենքի աղբահանությունը, որտեղ բնակվում է պատգամավորը: Հարակից բոլոր շենքերի աղբը ժամանակին տարվում է, բացի Ֆարմանյանի բնակված շենքից:
Մենք փորձեցինք Ֆարմանյանից պարզել` ի՞նչն է հակասության բուն պատճառը, ի՞նչ խնդիրներ ունեն ինքն ու քաղաքապետը, սակայն նա մեր հարցերին խոստացավ պատասխանել այսօր ԱԺ-ում կայանալիք ասուլիսի ժամանակ:
