Հայաստանի ազգային հավաքականի և Դորտմունդի «Բորուսիա»-ի կիսապաշտպան Հենրիխ Մխիթարյանը փետրվարի 8-ին տեղի ունեցած Բրեմենի «Վերդեր»-ի դեմ մրցավեճում ընդհատեց իր 1066 րոպե ձգվող գոլային երաշտն` այդ խաղում դառնալով դուբլի հեղինակ, իսկ Յուրգեն Կլոպի թիմը հաղթանակ տոնեց 5:1 հաշվով:
Sport-express.ru-ն հարցազրույց է ունեցել գերմանական հանրահայտ Bild պարբերականի լրագրող Հեյկո Նիդերերի հետ, ով մշտապես գրում է դորտմունդյան ակումբի մասին: Ներկայացնում ենք հարցազրույցի երկրորդ մասը:
Ի՞նչ կարծիք ունի նրա մասին Յուրգեն Կլոպը:
– Անընդհատ ընդգծում է, որ նա հրաշալի խաղացող է, որ արդարացված է նրա տրանսֆերը 27,5 մլն-ով ձեռք բերելը, քանի որ նա ֆուտբոլում կարող է անել ամեն ինչ: Մարզիչը Մխիթարյանին մշտապես բարձր է գնահատում, բայց ավելացնում է. նոր թիմին, նոր առաջնությանը և այլնին հարմարվելու համար ժամանակ է պետք:
Ի՞նչ մակարդակի գերմաներենի է տիրապետում Մխիթարյանը:
– Այդ լեզվով հարցազրույց չի տալիս: Բայց ջանասիրաբար սովորում է: Գերմաներեն մի փոքր խոսում է, բայց այդ լեզվով շփվել լրագրողների հետ, առայժմ չի կարողանում:
«Բորուսիա»-ն ձմեռային տրանսֆերային պատուհանի ժամանակ ձեռք բերեց Բելգրադի «Պարտիզան»-ի 21-ամյա տաղանդավոր կիսապաշտպան Միլոշ Յոիչի տրանսֆերը: Նոր մրցակի՞ց է Մխիթարյանի համար:
– Ոչ ուղղակիորեն: Նա դեռ համեմատաբար երիտասարդ է, նրան, ամենայն հավանականությամբ, հարմարվելու համար ավելի շատ ժամանակ պետք կգա: Ենթադրվում է, որ դորտմունդցիների կազմում առաջին անգամ կխաղա հաջորդ շաբաթ` որպես ջոկեր: Իհարկե, նա կարող է զարգանալ այնպես, որ ի վերջո Մխիթարյանին մրցակցություն ստեղծի: Բայց, կարծում եմ, դա անմիջապես չի լինի:
Ինչպե՞ս են Մխիթարյանին վերաբերվում դորտմունդցի երկրպագուները:
– Լավ: Միքին այնպիսի մարդ չէ, ինչպիսին, օրինակ` Օբամեյանգը, ով իր վրա ուշադրություն է հրավիրում սանրվածքով, մեքենայով: Մխիթարյանն ավելի զուսպ ու համեստ է… Երկրպագուները նրան հարգում են, որովհետև հաճախ է ցույց տալիս լավ ֆուտբոլ: Իհարկե, կարելի է ասել, նրան բարդ ժառանգություն է բաժին հասել… Մարիո Գյոտցեն Դորտմունդի գլխավոր աստղերից մեկն էր, նրան շատ էին սիրում` մինչ այն, քանի դեռ չէր տեղափոխվել «Բավարիա»:
Բայց խաղաոճով Մխիթարյանը մի փոքր տարբերվում է…
– Այո: Իմ կարծիքով` նա ավելի դասական 10 համար է: Մխիթարյանը խաղադաշտի կենտրոնում, փաստորեն, ռեժիսոր է, առավել հաճախ է փոխանցումներ կատարում: Գյոտցեն ավելի շատ միտված էր հարձակմանը, այդ թվում` իր դրիբլինգի շնորհիվ:
