Հոլիվուդյան դերասան Ջորջ Քլունին մեկնաբանել է իր համակրանքն ուկրաինացի ցուցարարների հանդեպ: Բեռլինում կայացած մամլո ասուլիսի ժամանակ իր նոր՝ «Գանձեր որոնողները» ֆիլմի ներկայացումից հետո նա աջակցություն է հայտնել Եվրամայդանին և Տիմոշենկոյին: Այս մասին տեղեկացնում է mir24.net-ը:
«Ես աջակցում եմ ուկրաինացի ակտիվիստներին, քանի որ կարևոր եմ համարում արտահայտել միտքն այն մասին, որ մարդիկ հույսով պայքարում են ինքնորոշման համար: Ես ծանոթ եմ Կլիչկոյի եղբայրներին դեռևս Օուշենի ընկերների մասին կինոնկարների նկարահանումների ժամանակներից: Ես հետևել եմ Յուլյա Տիմոշենկոյի գործին և գիտեմ, որ նա նստած է բանտում քաղաքական պատճառներով, ոչ թե այն բանի, որ հանցագործություն է կատարել»,- ասել է նա:
Դերասանի խոսքով՝ ուկրաինացի ցուցարարներին երկար պայքար է սպասվում:
Նշվում է, որ դերասանը ֆիլմի դերասանների ֆոտոսեսիային էր ներկայացել Տիմոշենկոյին պատկերող մարզաշապիկով:
Հիշեցնենք, որ 2013-ի դեկտեմբերին Քլունին Եվրամայդանի մասնակիցներին տեսաուղերձ էր հղել՝ ասելով, որ աշխարհում գոյություն չունի այնպիսի ժողովրդավարություն, որտեղ տեղի են ունենում ձերբակալություններ, և որտեղ խոչընդոտում են խաղաղ ցուցարարներին:
