Բրիտանացի քարտեզագիր Ռոբերտ Սյուչը երկրագնդի գետերի քարտեզը վերածել է արվեստի գործի: Բիրմինհեմցի գիտնականն աշխարհի բոլոր գետերի ավազանները նշել է տարբեր գույներով: Այս գործում նրան օգնության են հասել ժամանակակից տեխնոլոգիաները:
Աշխատանքի հեղինակն օգտվում է աշխարհագրական տեղեկատվական համակարգից (QGIS)՝ բաց սկզբնական կոդով տվյալների նախապատրաստության և քարտեզագրման համար: Այս քայլից հետո հերթը հասնում է GIMP պատկերների ծրագրային ապահովությանը՝ գծերի նուրբ ծրագրավորման համար: Հենց այս քայլն էլ քարտեզը վերածում է արվեստի գործի՝ հաղորդելով դրամատիկ տեսողական էֆեկտ:
«Ես եմ գույների, գծերի լայնության, դիզայնի հեղինակը, բայց ես չեմ նկարել, անգամ մի փոքրիկ գիծ չեմ ավելացրել: Այս ամենը բնության հիսաքանչ աշխատանքն է: Ես միայն գտա միջոցն այն յուրովի մարդկանց ցուցադրելու համար»,- խոստովանել է Սյուչը:
Աշխատանքն իրականացնելու համար պահանջվել է մի քանի ամիս: Եթե չլիներ սերն աշխարհագրության հանդեպ, ապա չէր լինի նաև այս հիասքանչ աշխատանքը: Քարտեզագիրը նաև ցանկացել է հեռանալ արդեն ձանձրալի դարձած ավանդական դասագրքերից և քարտեզներից:
Սյուչը նկարչական կրթություն չունի: Նրա նեղ մասնագիտացումը գեոտեղեկատվական համակարգերն են: Այսուհանդերձ, նախասիրությունը ևս նրան եկամուտ է բերում. գեղեցիկ քարտեզները լավ վաճառվում են:
