«Անիմաստ էր այն աղմուկը, որը բարձրացվել էր Կազանի հանդիպումից առաջ: Հասկանալի է, որ նման մակարդակի հանդիպումներից առաջ մենք գործ ունենք որոշակի քաղաքական PR-ի հետ: Բայց պետք էր հենց սկզբից էլ հասկանալ, որ այդ PR-ի համար հող չկար»,- Երևան-Մոսկվա տեսակամուրջի ընթացքում, գնահատելով կազանյան հանդիպումը, կարծիք հայտնեց Ռազմավարական մշակույթի ռուսական հիմնադրամի փոխնախագահ Անդրեյ Արեշևը:
Նա նշեց, որ ԼՂ հակամարտության կարգավորումը Մինսկի խմբի շրջանակներում գրեթե 20 տարի է, ինչ ընթանում է, և Կազանից առաջ էլ եղել են մի քանի առանցքայի պահեր, երբ կողմերն արդեն պատրաստ են եղել ամեն ինչ ստորագրել, անգամ նախնական համաձայնություն են տվել. «Ես նկատի ունեմ Քի Վեսթի իրավիճակը, որը ևս ձախողվեց։ Եվ հասկանալի է, թե ինչու է դա այդպես լինում: Այս հակամարտությունը մի քանի մակարդակներ ունի՝ կողմերի դիրքորոշումների անհամապատասխանելիությունը, կարգավորման միասնական փիլիսոփայության բացակայությունը, ինչպես նաև որոշ հարցերի առանձնացումն ընդհանուր կոնֆլիկտից»:
Արեշևը, հիշեցնելով մերձդնեստրյան հակամարտության կարգավորման գործընթացը և դրա շուրջ վերջին զարգացումները, նշեց, թե տպավորություն կար, որ ամեն ինչ լավ է լինելու, սակայն այս պահին կարգավորումը ձախողվել է, որովհետև չափազանց ակտիվ գործում է Միացյալ Նահանգները, որը մեծ ազդեցություն ունի Մոլդովայի վրա. «Ինչի՞ վրա է հիմնված մեր վստահությունը, որ Ղարաբաղում իրավիճակն այլ կլինի: Մի՞թե մեզ թվում է, թե ԱՄՆ-ի, Ֆրանսիայի, Թուրքիայի, Մեծ Բրիտանիայի խնդիրն է լինելու Ռուսաստանի միջնորդական առաքելության հաջողությանը համաշխարհային աջակցություն ցուցաբերելը՝ նման բան չի լինելու երբեք»:
