Հայաստանի Հանրապետության առողջապահության նախարարի պաշտոնակատար Արսեն Թորոսյանի գլխավորած պատվիրակությունը գտնվում է Ռուսաստանի Դաշնությունում` մասնակցելու Օբնինսկում կայանալիք Հայ-ռուսական առողջապահական 4-րդ համաժողովին:
Այցի շրջանակներում Մոսկվայում Հայաստանի դեսպանատանը Արսեն Թորոսյանը հանդիպել է ռուսաստանաբնակ հայազգի բուժաշխատողներին, առողջապահության ոլորտի կազմակերպիչներին ու գործիչներին:
Նախարարի պաշտոնակատարը ողջունելով գործընկերներին` շեշտել է, որ նոր Հայաստանի կառուցման գործում հատկապես կարևոր են անմիջական շփումները` ընդգծելով հայազգի բժիշկների, ոլորտի կազմակերպիչների դերակատարությունը առողջապահության համակարգի զարգացման հարցում: Արսեն Թորոսյանը կոչ է արել ավելի պրոակտիվ լինել հայրենիքի հետ կապված նախաձեռնություններում։
Հայկական պատվիրակությունը ներկայացրել է նաև 2019 թվականի հուլիսին Երևանում սպասվող Հայաստանի բժշկական միջազգային 5-րդ գիտաժողովի նախապատրաստական աշխատանքները` հրավիրելով ռուսաստանաբնակ հայրենակիցներին մասնակցելու միջոցառումներին։
Դեսպանատան ոչ պաշտոնական ընդունելությանը մասնակցել են նաև ՌԴ առողջապահության նախարարի տեղակալներ Դմիտրի Կոստենիկովը և Օլեգ Սալագայը։
Արսեն Թորոսյանի գլխավորած պատվիրակությունը ՌԴ առողջապահության նախարարի տեղակալ Դմիտրի Կոստենիկովի ուղեկցությամբ այցելել է նաև Մոսկվայի նահանգի ուրոլոգիայի հիմնադիր, արվեստի սիրահար Արամ Աբրահամյանի 120 ամյակին նվիրված ցուցահանդեսի բացմանը։