Թե հայկական, և թե ադրբեջանական կողմերը գիտակցում են, որ ղարաբաղյան բանակցություններն այլընտրանք չունեն. բայց եթե Հայաստանի համար ԵԱՀԿ Մինսկի խմբի առաքելությունն առաջնահերթություն է, ապա Ադրբեջանի համար այս ձևաչափն ավելորդություն է: «Առաջին լրատվական»-ի հետ զրույցում նման տեսակետ հայտնեց Ֆրանսիայի Ռազմավարական հետազոտությունների հիմնադրամի փորձագետ Կայծ Մինասյանը:
«Ազերիները կանեն ամեն ինչ՝ տապալելու ԵԱՀԿ Մինսկի խմբի ձևաչափը: Նրանք ամեն օր կրակում են սահմանին՝ ցույց տալու, որ Մինսկի խմբի գոյությունն անիմաստ է, այնինչ Հայաստանի համար բանակցությունների շարունակությունն առաջնահերթություն է: Մենք պետք է ասենք միջազգային հնարությանը՝ նայեք՝ ով է բանակցությունների շահագրգիռ կողմը: Միաժամանակ, միջազգային հանրությանը դժվար է ապացուցել, որ առաջինն ադրբեջանցիներն են կրակում, քանի որ ադրբեջանցիները պնդում են, թե հայերն են նախահարձակ լինում: Այնպես որ, Հայաստանն ու Ղարաբաղը պետք է մեխանիզմ գտնեն՝ միջազգային հանրությանը ցույց տալու իրական հրահրողին: Մինչև նման մեխանիզմ չհայտնաբերվի, Մինսկի խմբին դժվար կլինի որևէ բան ապացուցել»,- ասաց նա:
Հարցին՝ ձեռնտո՞ւ է արդյոք աշխարհին ղարաբաղյան պատերազմը, թե՞ այնուամենայնիվ՝ ոչ, Կայծ Մինասյանը համոզմունք հայտնեց, որ պատերազմ սկսելը կողմերից և ոչ մեկի շահերից չի բխում, մանավանդ, որ մոտենում են Սոչիի Օլիմպիական խաղերը: «Մի բան է պատերազմ սկսելը, մեկ այլ բան՝ ավարտելը: Միանշանակ, բոլոր գերտերություններն իրենց շահերն ունեն թե Հայաստանից, թե Ադրբեջանից, և պետք չէ կարծել, որ Մինսկի խմբի համանախագահները ցանկանում են լուծել բացառապես ղարաբաղյան հարցը: Այդ շրջանակում նրանք ունեն իրենց սեփական շահերը: Եվ քանի դեռ նրանց շահերը չեն խանգարվել, բախումները թող շարունակվեն: Սա շատ ցինիկ մոտեցում է, սակայն սա է իրականությունը»,- ասաց Ֆրանսիայի Ռազմավարական հետազոտությունների հիմնադրամի փորձագետը:
