Լիբանանում հրատարակվող «Արարատ» թերթի խմբագիր Ահարոն Շխրտմյանը, անդրադառնալով Լիբանան-Սիրիա հարաբերություններին, նշել է, որ երկու պետությունների միջև նախապես ձեռք բերված պայմանավորվածությունների արդյունքում լարվածություն չկա, փոխարենը լարվածություն կա արմատական հոսանքների կողմից, բայց դրանք էական չեն:
Նա նշել է, որ Սիրիայի ներքին իրավիճակը բավական լարված է, քանի որ քաղաքական որոշ հոսանքներ սոցիալական բարեփոխումներ են պահանջում։ Իշխանությունը տրամադրված է իրագործել այդ բարեփոխումները: Ընդ որում՝ բարեփոխումները հիմնական են՝ ընտրական նոր օրինագծի մշակում, բազմակուսակցական համակարգի հաստատում, մամուլի ազատության հաստատում, տնտեսական բարեփոխումների իրագործում: «Այս ամենը սիրիական իշխանությունները մտադիր են իրագործել, և արդեն որոշ քայլեր արել են այդ ուղղությամբ»,- ասել է Ահարոն Շխրտմյանը՝ ավելացնելով, որ կան ուժեր, որոնք ավելի արմատական կեցվածք ունեն և դրսից հրահրվում են՝ բարեփոխումներ պահանջելով իշխանափոխության ճանապարհով։ Այս ամենի մեջ բացասական դերակատարություն ունի Թուրքիան: