Եվրոպայի օրվա կապակցությամբ Հայաստանում Եվրոպական միության պատվիրակությունը կազմակերպում է դասական համերգ հայտնի սոպրանո Աննա Սամուիլի մասնակցությամբ:
Համերգը տեղի է ունենալու ս.թ. հունիս 28-ին ժամը 19:00-ին Արամ Խաչատրյան համերգասրահում: Վերջին տարներին ձևավորված ավանդույթի համաձայն՝ պատվիրակությունը, Հայաստանի Ֆիլհարմոնիկ նվագախմբի հետ միասին, կազմակերպում է Եվրոպայի օրվան նվիրված դասական համերգներ: Այս տարի ԵՄ պատվիրակությունը արդեն սկսել է Եվրոպայի օրվան նվիրված տոնակատարությունները բացօթյա հանրային միջոցառմամբ, որը տեղի ունեցավ ս.թ. մայիսի 21-ին Սիրահարների այգում:
Եվրոպայի օրը մի շարք միջոցառումների և տոնակատարությունների առիթ է հանդիսանում` մոտեցնելով Եվրոպան ինչպես իր, այնպես էլ հարևան պետությունների քաղաքացիների համար: 1950թ. մայիսի 9-ին Ռոբերտ Շումանը ներկայացրեց կազմակերպված Եվրոպայի կառուցման իր տեսլականը, որն անհրաժեշտ էր խաղաղ փոխհարաբերությունների և զարգացման համար:
Այսօր մայիսի 9-ը վերածվել է Եվրոպայի խորհրդանիշի (Եվրոպայի օր), որը դրոշի, զինանշանի, նշանաբանի և միասնական արժույթի (եվրո) հետ միասին, արտահայտում է Եվրոպական միության քաղաքական ինքնությունը:
Աննա Սամուիլը հայտնի սոպրանո է, ով Բեռլինի Deutsche Staatsoper–ի առաջատար երգչուհին է: Նա այս համերգաշրջանում կատարելու է «Չղջիկ», «Սիրո ըմպելիք», «Այսպես են վարվում բոլորը», «Տրավիատա» օպերաների գլխավոր դերերգերը, ինչպես նաև մասնակցելու է Նոր տարվա ամենամյա համերգին և Բեթհովենի 9-րդ սիմֆոնիայի կատարմանը՝ Դանիել Բարենբոյմի ղեկավարությամբ: Տկն. Սամուիլը մասնակցել է համաշխարհային հայտնի փառատոններին և հրավիրվել այնպիսի հռչակված թատրոններ, ինչպիսիք են Metropolitan Opera (Նյու Յորք) New York, Teatro Alla Scala (Միլան), Salzburg Festival, Bunka Kaikan (Տոկիո), Bayerische Staatsoper (Մյունխեն), Royal Opera House Covent Garden (Լոնդոն) և այլն:
