Դեկտեմբերի 9-ին կայանալիք ԱԺ արտահերթ ընտրություններին հին Ընտրական օրենսգրքով, հատկապես ռեյտինգային ընտրակարգով մասնակցելը քաղաքական դաշտում առկա ոչ շատ մեծ ուժերին դժվար կացության մեջ դրեց: Յուրաքանչյուր ընտրատարածքում առնվազն հինգ թեկնածու առաջադրելը թե՛ մարդկային և թե՛ ֆինանսական ռեսուրսի անհրաժեշտություն է պահանջում։ Փոքր կուսակցություններից շատերը հենց այս պատճառաբանությունը բերելով ընտրություններին առհասարակ չեն մասնակցում, ոմանք էլ միավորվում են և մեկ կուսակցության ցուցակով գնում։ Այս դեպքում նույնիսկ դաշինք կազմելն է վտանգավոր, որովհետև հնարավոր է չհաղթահարեն նաև 7 տոկոսի անցողիկ շեմը։
Հայաստանի Դեմոկրատական կուսակցության նախագահ Արամ Սարգսյանը «Առաջին լրատվական»-ի հետ զրույցում չթաքցրեց՝ իրենց վերջնական որոշման վրա հենց ռեյտինգային ընտրակարգի առկայության հանգամանքն է ազդեցություն ունենալու։ Արամ Սարգսյանը նաև նշեց, որ առաջիկա օրերին հայտարարություն կտարածեն՝ մասնակցո՞ւմ են ընտրություններին, դաշինքո՞վ, թե՞ առհասարակ որոշում են բոյկոտել. «Հիմա քննարկումներ են գնում, այս պահին պատրաստ չեմ պատասխանել»։
Արամ Սարգսյանը հավելեց. «Հին Ընտրական օրենսգրքի պահպանումը շատ մեծ խոչընդոտ է նորմալ ընտրությունների անցկացման համար»։
Ըստ մեր զրուցակցի՝ արդեն միանշանակ պարզ է, որ նորմալ ընտրություններ չեն լինելու. «Որովհետև քաղաքական ուժերին հնարավորություն չի տրվում ծրագրային, գաղափարական պայքար անցկացնելու։ Դա մեզ համար արդեն բացահայտ է»։
ԱԻՄ առաջնորդ Պարույր Հայրիկյանը «Առաջին լրատվական»-ի հետ զրույցում ասաց, որ թեպետ ինքն անձամբ բոյկոտում է առաջիկա խորհրդարանական ընտրությունները, սակայն իր ղեկավարած ուժը մասնակցելու է. «Իմ բոյկոտը կապված է այն բանի հետ, որ երկքաղաքացիներին, օրինակ՝ ԱԻՄ անդամ Կարո Եղնուկյանին, Արա Պապյանին, թույլ չի տրվում մասնակցել ընտրություններին, Ժիրայր Սեֆիլյանն էլ քաղաքացիություն չստացավ, ես խիստ բացասական եմ գնահատում, այդ պատճառով էլ նման որոշում եմ կայացրել»։
Հայրիկյանը նշեց. «Ես իմ բողոքը այդպես եմ արտահայտելու, ինքս անձամբ չեմ մասնակցի, բայց ԱԻՄ-ականները կմասնակցեն։ Հայաստանից դուրս ապրող ՀՀ քաղաքացիներին, Հայաստանի տերերին շարունակում են թույլ չտալ մասնակցել ընտրություններին, լակոտությունը շարունակվում է։ Ես անձամբ մասնակցում եմ ԱԻՄ-ականների միջոցով»։
Մեր զրուցակիցը նաև հավելեց. «Մերոնք հիմա ակտիվ աշխատում են, դեռ վերջնական որոշում չկա՝ դաշինքո՞վ ենք մասնակցելու, թե՞ առանձին, բայց որ մասնակցելու ենք՝ դա հաստատ է։
Այս պահի դրությամբ դեռ վերջնական որոշում չունի նաև «Ժառանգություն» կուսակցությունը։ Տեղեկացանք, որ մի շարք արևմտյան գաղափարախոսություն կրող ուժերի հետ դեռ ընթանում են ինտենսիվ բանակցություններ՝ դաշինքով մասնակցելու համար։
