Ֆրանսիայի հայկական կազմակերպությունները համակարգող խորհրդի հայտարարությունը, որի ներքո ստորագրել են ինչպես հայ, այնպես էլ Ֆրանսիայի հասարակական, քաղաքական հայտնի գործիչներ, հրապարակել է ֆրանսիական Le Monde պարբերականը:
Հայտարարությանը միացած գործիչները դատապարտում են Թուրքիայի նախագահ Ռեջեփ Թայիփ Էրդողանի ներկայությունը Փարիզում Առաջին աշխարհամարտի 100-ամյակի միջոցառումներին, ինչը, ըստ նրանց, կարող է խաթարել դրանց իմաստը:
Հայտարարության ներքո ստորագրել են Եվրոպական հակառասիստական շարժման նախագահ Բենժամին Աբտանը, աշխարհահռչակ շանսոնյե Շառլ Ազնավուրի որդին՝ Նիկոլա Ազնավուրը, Աթենքի համալսարանի պրոֆեսոր Չենգիզ Աքթարը, պատմաբաններ՝ Անետ Բեքերը, Համիթ Բոզարսլանը, փիլիսոփա Պասկալ Բրյուկները, Ֆրանսիայի Ազգային ժողովի պատգամավորներ՝ Մարին Բրինիեն, Ժան Կլոդ Բուշեն, Վալերի Բուայեն, Լյուկ Կարվունասը, Ֆրանսիայում Քրդստանի ժողովրդավարական խորհրդի նախագահ Վեդատ Բինգոլը, նախկին ֆուտբոլիստ Յուրի Ջորկաեֆը, տնտեսագետ և քաղաքագետ Ահմեդ Ինսելը, Լիոնի նախկին քաղաքապետ Ժորժ Կեպենեկյանը և այլք:
