ԱՄՆ-ի նախագահ Դոնալդ Թրամփը հոկտեմբերի 31-ին երկարացրել Է այն արգելքի գործողությունը, որն ավելի վաղ դրվել Էր Իրանից նավթի ու նավթամթերքի մատակարարումների վրա: Այդ մասին, հայտնել Է Սպիտակ տան մամուլի ծառայությունը: Հրամանագրում պետության ղեկավարը վստահություն Է հայտնել, որ աշխարհում բավականաչափ նավթ կա, որպեսզի հնարավոր լինի այդ ոլորտում անհիվանդագին դադարեցնել համագործակցությունն Իրանի հետ:
«Ես եկա այն եզրակացության, որ աշխարհում այլ երկրների կողմից, բացի Իրանից, բավականաչափ նավթ ու նավթամթերք Է արտադրվում, որպեսզի թույլ տրվի զգալիորեն կրճատել օտարերկրյա ֆինանսական կազմակերպությունների կողմից Իրանից նավթի ու նավթամթերքի գնումները»,- նշել Է պետության ղեկավարը: ԱՄՆ-ի ղեկավարը խոստացել Է «ուշադիր հետեւել իրադրությանը»: Մինչդեռ Իրանի նախագահ Հասան Ռոհանին նախօրյակին հայտարարել Է, որ Թեհրանը չի վախենում Վաշինգտոնի սպառնալիքներից: Նա նշել Է, որ իրանցի ժողովուրդը հաստատակամություն ու տոկունություն կդրսեւորի ամերիկյան պատժամիջոցների դեմ հանդիման, որոնք նա որակել Է «ամերիկացիների կողմից կեղեքման» նոր փուլ:
Ընդսմին Ռոհանին չի բացառել, որ ժողովուրդը հաջորդ մի քանի ամսվա ընթացքում խնդիրներ կունենա, որոնց սրությունը մեղմացնելու համար կառավարությունը կձեռնարկի առկա բոլոր հնարավորությունները:
Ավելի վաղ Իրանի արտաքին գործերի նախարար Մոհամադ Ջավադ Զարիֆը հայտարարել Էր, որ ԱՄՆ-ն իր նպատակներին չի հասնի Իրանի դեմ նոր պատժամիջոցներ սահմանելով, դրանց պատճառով ոչ մի նոր բան տեղի չի ունենա: «Իրանի դեմ պատժամիջոցների հարցում Վաշինգտոնի տնտեսական եւ հատկապես քաղաքական նպատակներն իրագործել չի հաջողվի: Շատ քիչ հավանական Է, որ ԱՄՆ-ն իր տնտեսական խնդիրները կիրագործի պատժամիջոցների հաշվին, իսկ այն բանի հավանականությունը, որ այդ պատժամիջոցների քաղաքական նպատակները կիրագործվեն, ընդհանրապես չկա»,- ասել Է Զարիֆը:
ԱՄՆ-ի նախագահ Դոնալդ Թրամփը մայիսի 8-ին հայտարարել Է, որ Վաշինգտոնը դուրս Է գալիս միջուկային ծրագրի վերաբերյալ Իրանի հետ համաձայնագրից եւ վերականգնում Է Իրանի դեմ բոլոր պատժամիջոցները, այդ թվում՝ պատժամիջոցներն այն երկրների նկատմամբ, որոնք բիզնես են վարում Իրանի հետ: ԱՄՆ-ն օգոստոսի 7-ից վերականգնել Է Իրանի դեմ պատժամիջոցների մի մասը: Ավելի Էական պատժամիջոցները, որոնք կընդգրկեն նավթի արտահանումը, սպասվում են նոյեմբերի սկզբին: Վեցյակի մնացած անդամները դեմ են արտահայտվել ԱՄՆ-ի այդ քայլին: Վաշիգնտոնի եվրոպական գործընկերները հայտարարել են, որ մտադիր են պահպանել Իրանի հետ կնքված գործարքի պայմանները:
