16-ամյա բրիտանացի Լյուիս Կլարկը՝ Բրիստոլից, դարձել է Հարավային բևեռը նվաճած ամենաերիտասարդ մարդը: Այս մասին գրում է The Telegraph-ը:
Լյուիսը դահուկներով առաջ է շարժվել օրական միջինը 8 ժամ՝ -50 աստիճան ցրտի և 200 կմ/ժ արագությամբ քամու պայմաններում: Ճանապարհորդությունը նրանից խլել է 48 օր:
Լյուիսը իր ռեկորդին նախապատրաստվել է մի քանի ամիս: Նա նախապատրաստվել է Նորվեգիայում, Գրենլանդիայում և այլ վայրերում: Նրան ուղեկցել է բևեռախույզ Քարլ Ալվին, որի հետ դեռահասը Անտարկտիկայով հաղթահարել է մոտ 1130 կմ ճանապարհ:
«Իհարկե, ես գիտեի, որ դա բարդ կլինի, սակայն պարզվեց՝ դա ավելի բարդ է, քան ես կարող էի պատկերացնել»,- նշել է դեռահասը:
«Երբեմն ես մտածում եմ այն մասին, թե քանի մարդ է կատարել նույն բանը: Վերջին 100 տարվա ընթացքում նրանք 300-ն են: Եվ այժմ ես եմ դա անում: Դա շատ լավ է»,- ասել է Լյուիսը:
Ներկայում նա պետք է ապացույցներ ներկայացնի Գինեսի ռեկորդների գրքում պաշտոնապես գրանցվելու համար:
