«168 ժամ» թերթը գրում է. «Ռուսաստանի իշխանությունները որոշել են 2014թ. հուվարի 1-ից արգելել այն ավտոմեքենաների ներմուծումը, որոնք համապատասխանում են EURO-4 ստանդարտին: Սա նշանակում է, որ մինչև 2009թ. արտադրված ավտոմեքենաների ներմուծումը Ռուսաստան կարգելվի, քանի որ 2009թ. սկսած եվրոպական ավտոարտադրողների համար սկսել է գործել նոր EURO-5 ստանդարտը: Պաշտոնական հիմնավորումն այն է, որ իշխանությունները մտահոգված են շրջակա միջավայրի պաշտապանությամբ և ցանկանում են սահմանափակել մթնոլորտ վնասկար նյութերի արտանետումը:
Արգելելով EURO-4 չափանիշներին համապատասխանող արտասահմանյան մեքենաների ներմուծումը, Ռուսաստանի իշխանությունները աչք են փակում այն փաստի վրա, որ ռուսական ավտոարտադրողների թողարկած մեքենաները չեն համապատասխանում անգամ մերժելի EURO-4-ի չափանիշներին:
Նման խտրականությունը ցույց է տալիս, որ իրականում Ռուսաստանի իշխանությանը շատ քիչ է հետաքրքրում էկոլոգիան և մթնոլորտ արտանետվող թունավոր նյութերի քանակի սահմանափակումը: Իշխանությունն իր այս քայլով փորձում է փրկել սեփական փլուզվող ավտոարդյունաբերությունը, ռուս մարդկանց ստիպողաբար նստեցնել ռուսական արտադրության մեքենաներ։
Իսկ որքանո՞վ սա կարող է կապ ունենալ Հայաստանի հետ: Շուտով Հայաստանը կդառնա Մաքսային միության անդամ և Ռուսաստանը փորձելու է նույն չափանիշներն ու արգելքները պարտադրել Հայաստանին: Հայաստանում այժմ մեքենաների ներմուծման վրա որևէ արգելք գոյություն չունի և կարելի է ներմուծել ցանկացած թվականի արտադրության փոխադրամիջոց: Հայաստան ներմուծվող մեքենաների մեծ մասը EURO-2 և EURO-3 ստանդարտի մեքենաներ են: Ի՞նչ կլինի, եթե Հայաստանում ևս արգելվի EURO-5-ից ցածր մեքենաների ներմուծումը, այն պատճառաբանությանբ, որ դրանք հետագայում կարող են հայտնվել Ռուսաստանում»,-գրում է թերթը:
Մանրամասները՝ թերթի այսօրվա համարում:
