Գիտնականները պարզել են, որ կանայք կարողանում են տղամարդու դեմքից որոշել՝ նա համասեռամո՞լ է, թե ոչ: Բնությունը կանանց հնարավորություն է տվել, որպեսզի առանց ժամանակ կորցնելու սկսեն գայթակղել այն տղամարդկանց, որոնք հնարավորություն ունեն իրենց երեխաներ պարգևել: Պարզվում է՝ տղամարդու սեռական կողմնորոշումը դաջված է նրա դեմքին: Հենց դիմագծերով կինը որոշում է իր դիմաց կանգնած տղամարդու սեռական կողմնորոշումը: Այս մասին հաղորդում է The Daily Telegraph-ը:
Այդ կարողությունը կանանց մոտ առավել արտահայտված է օվուլյացիայի փուլում: Հենց այս ժամանակ է կանանց մոտ ակտիվանում բազմանալու բնազդը: Այս ուսումնասիրությունները կատարել են Տորոնտոյի համալսարանի մասնագետները՝ հարցում անցկացնելով 40 ուսանողուհիների շրջանում:
Ուսանողուհիներին ցուցադրել են 80 տղամարդու լուսանկար՝ առաջարկելով բնութագրել և ասել այդ տղամարդկանց սեռական կողմնորոշումը: Լուսանկարների կեսը պատկերում էին հետերոսեքսուալների, մյուս կեսը՝ հոմոսեքսուալների: Գիտնականներն այնպես էին արել, որպեսզի նկարվելիս տղամարդկանց մոտ ոչ մի զգացմունք չլինի, ինչը կարող էր շեղել հարցվողների ուշադրությունը: Այսպիսով, հարցվողները պետք է հույսը դնեին իրենց զգացողությունների վրա:
Կանայք լուրջ հաջողություններ են ունեցել համասեռամոլներին գտնելու հարցում: Բացի այդ, ևս 40 կանանց տվել են ընթերցելու էրոտիկ բովանդակությամբ պատմվածք, մյուս 40-ին՝ ոչ: Դրանից հետո առաջարկել են պարզել նկարներով տղամարդկանց սեռական կողմնորոշումը: Պարզվել է, որ նրանք, ովքեր կարդացել են էրոտիկ պատմվածքները և ավելի «հուզված են» եղել, համասեռամոլներին ավելի լավ են տարբերել:
Այս ֆենոմենը, սակայն, չի աշխատել կանանց դեպքում, քանի որ երբ նրանց լեսբուհիների նկարներ են ցուցադրել, ճիշտ պատասխանները չեն գոհացրել: Գիտնականների հոդվածն ամբողջությամբ հրապարակված է Psychological Science ամսագրում: