Եթե նախկինում առաջին նախարարների նշանակման ժամանակ քաղաքական որոշումներ էին կատարվում, ապա հիմա դրա անհրաժեշտությունը չկա և վարչապետի որոշումն է, որ նախարարների պաշտոններում նշանակվեն բացառապես ոլորտների մասնագետներ: Այս մասին «Առաջին լրատվական»-ի հետ զրույցում նշեց «Ելք» խմբակցության ղեկավար Լենա Նազարյանը:
Նրա խոսքով` եթե պրոֆեսիոնալ մասնագետը զբաղեցնի նախարարի պաշտոնը, ադապտացման երկար ժամանակ չի պահանջվի և ավելի շուտ կհասնեն բարեփոխումների:
«Իսկապես շատ կարևոր ոլորտներ են և պետք է մասնագետներ լինեն այդ պաշտոններում: Վերջապես եթե արտահերթ ընտրությունները շուտ կայանան, նոր կառավարությունում նորից առաջնային է լինելու պրոֆեսիոնալիզմը»,-ասաց Նազարյանը:
Դիտարկմանը, որ շատերը քննադատեցին Փաշինյանի կադրային քաղաքականությունը, արդյոք վերանայե՞լ եք այն, Լենա Նազարյանը դրական պատասխան տվեց. «Կարելի է ասել՝ վերանայել ենք, բայց դա շատ նորմալ է: Կառավարությունում կարող են փոփոխություններ լինել, այն մարդիկ, որոնք արդյունքներ չեն գրանցի, ոչինչ քարին գրված չէ, կհեռացվեն աշխատանքից»:
