Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Արմեն Խաչատրյանի նախագահությամբ պետք է սկսվեր Քրիստինե Տատարոգուլոյի գործի դատավարությունը:
Ըստ մեղադրանքի՝ 34-ամյա Քրիստինե Տատարոգուլոն վիճաբանել է իր ընկերոջ ծաղկավաճառ մոր՝ Ծ.-ի հետ, հայհոյանքներ է տվել, ոտքով հարվածել ոտքին, ապտակել, ապա, ըստ նախաքննական մարմնի՝ որպես զենք օգտագործելով իր մոտ եղած էլեկտրահարիչը, էլեկտրահարել է Ծ.-ին:
Բացի դրանից, Քրիստինե Տատարոգուլոն անդրադարձել է նաև ընկերոջը՝ Ս.-ին: Նրան ևս հայհոյել է, ապա իր մոտ եղած դանակն օգտագործել է որպես զենք, սպառնացել է ու փորձել հարված հասցնել Ս.-ին:
Քրիստինեին մեղադրանք է առաջադրվել զենքի գործադրմամբ կատարված խուլիգանության համար՝ ՀՀ քրեական օրենսգրքի 258 հոդվածի 4-րդ մասով:
Նրա նկատմամբ որպես խափանման միջոց կիրառվել է կալանավորումը:
Դատական նիստը հետաձգվեց՝ ամբաստանյալի շահերը պաշտպանելու նպատակով հանրային պաշտպան ներգրավելու համար:
Քրիստինեն նախկին դատվածություններ ունի: Նա մոտ վեց տարով մեծ է այն տղամարդուց, ում ընտանիքի նկատմամբ զենքի գործադրմամբ կատարել է մեղսագրված խուլիգանությունը:
Ընդ որում՝ Քրիստինեն ոտնձգել է ոչ միայն երիտասարդի ծաղկավաճառ մայրիկի, այլև հոր նկատմամբ՝ բենզինի գործադրմամբ: Այդ դրվագը նախաքննության ընթացքում կարճվել է:
«Ամազոնուհի» դարձած Քրիստինեն նախկին ընկերոջ ծնողներին «պատերազմ է հայտարարել» ամենայն հավանականությամբ՝ երիտասարդի հետ ամուսնանալու մեծ ու, փաստորեն, անպատասխան ցանկությունից: Ինքը՝ Քրիստինեն, երեխա ունի:
Երիտասարդը քրեական գործի քննությանը մասնակցում է վկայի կարգավիճակով: Նա դատարան է գալիս իր շահերի պաշտպանի հետ, որպեսզի հնարավորինս պաշտպանված լինի կալանքի տակ գտնվող Քրիստինեի հրահրումներից:
