Ավելացնել մետրոյի կայարանների թիվը. ՀՅԴ–ն ներկայացրել է ավագանու ընտրությունների իր ծրագիրը

«Դաշնակցությունը» տարածել է ավագանու ընտրություններում կուսակցության ներկայացրած ծրագիրը։

Ստորեւ ներկայացնում ենք ՀՅԴ նախընտրական ծրագիրն ամբողջությամբ.
«Հանուն ժամանակակից եւ զարգացող Երեւանի՝

• ստեղծել միասնական տրանսպորտային համակարգ,

• կիրառել անվտանգ երթեւեկության ժամանակակից մեխանիզմներ, բեռնաթափել երթեւեկությունը,

• վերականգնել եւ զարգացնել էկոլոգիապես մաքուր տրանսպորտային միջոցների ցանցը,

• ավելացնել մետրոյի կայարանների թիվը (Աջափնյակ),

• կարգավորել վթարային շենքերի հիմնախնդիրը, ամրապնդել սեյսմիկ անվտանգության մեխանիզմները,

• ներդնել բնակֆոնդի արդյունավետ կառավարման մեխանիզմներ,

• վերազինել վերելակները˒ կարգավորել վերելակային տնտեսության անվտանգ շահագործման հետ կապված խնդիրները˒

• ստեղծել մայրաքաղաքի հասարակական կարգը եւ քաղաքային գույքը պահպանող համայնքային (մունիցիպալ) ոստիկանություն.

Հանուն կանաչ եւ գեղեցիկ Երեւանի՝

• պահպանել եւ ավելացնել այգիները, կանաչ գոտիները, ջրավազանները, շատրվանները,

• Հրազդանի կիրճը, Հաղթանակի այգին եւ նրան հարող տարածքը սահմանել որպես բնապահպանական գոտի,

• Երեւանյան լիճը եւ նրան հարող տարածքը վերածել համաքաղաքային նշանակության հանրային հանգստի, կանաչ գոտիների,

• կրկնապատկել կանաչ տարածքները՝ հատուկ ուշադրություն դարձնելով ծառատեսակների ընտրությանը.

Հանուն բարեկարգ եւ խնամված Երեւանի՝

• ընդունել եւ գործադրել Երեւան քաղաքի քաղաքաշինական ռազմավարություն,

• խիստ վերահսկողություն սահմանել ճարտարապետաշինարարական գործունեության նկատմամբ,

• կառուցել տրանսպորտային էստակադաներ, շրջանցող ճանապարհային հանգույցներ,

• կառուցել կենտրոնացված բազմահարկ ավտոկայանատեղիներ,

• կասեցնել ապօրինի հողօգտագործումը, կարգավորել ապօրինի շինությունների հիմնախնդիրը,

• կարգավորել աղբահանության խնդիրը, ստեղծել աղբի տեսակավորման եւ էկոլոգիական վերամշակման տնտեսություն,

• ստեղծել բացօթյա տարածքներում առեւտրի հարմարավետ պայմաններ.

Հանուն նոր սերնդի Երեւանի՝

• ընդլայնել մանկապարտեզների ցանցը (թերբեռնված հիմնական դպրոցներին կից բացել նախակրթարաններ),

• բարելավել կրթօջախների շենքային պայմանները եւ նյութատեխնիկական բազան,

• խթանել ՏՏ կրթության կենտրոնների ստեղծումը,

• աջակցել տաղանդավոր եւ շնորհալի երիտասարդներին գիտական, ստեղծագործական ծրագրերի իրականացման հարցում.

Հանուն մշակութային Երեւանի՝

• պահպանել Երեւանի պատմամշակութային արժեք ներկայացնող կառույցները, կանխել մայրաքաղաքի ճարտարապետական դիմագծի խաթարումը,

• ընդլայնել մարմնակրթական եւ գեղագիտական կենտրոնների ցանցը,

• հատուկ ուշադրություն դարձնել արվեստի դպրոցներին եւ մշակութային հաստատություններին.

Հանուն հոգատար եւ արդար Երեւանի՝

• իրականացնել սոցիալապես առավել խոցելի խավերի աջակցության սոցիալական պաշտպանության ծրագրեր,

• մշակել եւ ներդնել սոցիալական բնակֆոնդի հայեցակարգ, երիտասարդ եւ բազմազավակ ընտանիքներին անհատույց կամ ցածր վարձավճարով տրամադրել բնակարաններ,

• ստեղծել տարեցների խնամքի եւ ժամանցի կենտրոններ,

• տեղաշարժվելու սահմանափակ հնարավորություն ունեցողների համար ապահովել լիարժեք միջավայր,

• վերանորոգել եւ վերազինել պոլիկլինիկաները, բարձրացնել մատուցվող ծառայությունների որակը եւ մատչելիությունը,

• ստեղծել անօթեւանների գիշերային կենտրոններ։

Հանուն համահայկական Երեւանի՝

• ապահովել Երեւանի յուրաքանչյուր վարչական շրջանի ուղղակի կապը սփյուռքի խոշոր բնակավայր քաղաքներից մեկի հետ՝ գործնական˒ տնտեսական եւ մշակութային առումներով˒

• հանդես գալ համահայկական նշանակության միջոցառումների անցկացման նոր նախաձեռնություններով»։