Հանրապետության գլխավոր թունաբան Միքայել Գաբրիելյանը հորդորում է տոնական օրերին չչարաշահել ալկոհոլը, որպեսզի թունավորումները չմթագնեն ամանօրյա ուրախ տրամադրությունը: Այս մասին նա ասաց «Առաջին լրատվական»-ի հետ զրույցում:
Թունաբանի խոսքով՝ պետք է զերծ մնալ տարբեր տեսակի ալկոհոլային խմիչքներն իրար խառնելուց: «Եթե սկսել եք օղուց, ապա օղիով էլ շարունակեք և ավարտեք: Այլապես հնարավոր է՝ ալկոհոլային թունավորմամբ հայտնվեք հիվանդանոցում»,- ասաց Միքայել Գաբրիելյանը՝ միաժամանակ հավելելով, որ խմիչքի օրական հստակ չափաբաժին գոյություն չունի, և դրա ընդունման քանակությունը խիստ անհատական բնույթ է կրում, յուրաքանչյուր օրգանիզմ անհատական պաշարներ ունի:
Հանրապետության գլխավոր թունաբանը նաև նշեց, որ Նոր տարվա տոներից հետո ինքը, որպես կանոն, ալկոհոլային թունավորմամբ մի քանի այցելու հաստատ ունենում է:
Հարցին՝ ի՞նչ կարող են անել խմիչքները չարաշահած անձինք խումհարից դուրս գալու համար, Միքայել Գաբրիելյանը կաճ ու կոնկրետ պատասխանեց՝ չխմել այնքան, որ հաջորդ օրը այդքան վատ վիճակում հայտնվես:
Հիշեցնենք, որ ավստրալացի հետազոտողների խումբը խումհար չառաջացնող գարեջուր է ստեղծել: Որպեսզի հնարավոր լինի խուսափել օրգանիզմի ջրազրկումից՝ խումհարի հիմնական պատճառից, առաջարկել են ավելացնել էլեկտրոլիտներ: Դրանք օգնում են հեղուկը պահել օրգանիզմում և հաջողությամբ կիրառվում են սպորտային ըմպելիքներում:
