«Նոր Յառաջ»-ը գրում է, որ Հայաստանում Լիբանանի դեսպան Ժան Մաքարոն բարձր է գնահատել 2013-ին հայ-լիբանանյան հարաբերությունների մակարդակն՝ ընդգծելով Լիբանանի աճող դերը հայկական տնտեսության զարգացման մեջ:
«Հայ-լիբանանյան հարաբերությունները շատ կարևոր են: Դրանք ներկայումս ավելի են բարելավվում, ինչը մեծապես նպաստում է հայ և արաբ ժողովուրդների մերձեցմանը»,- ասել է դեսպանը։
Նրա խոսքերով՝ երկկողմ տնտեսական համագործակցությունն աճում է գրեթէ բոլոր բնագավառներում՝ հեռահաղորդակցության, բանկային, առևտրի և զբոսաշրջության: Հայաստանում լիբանանյան մասնավոր հատվածի ներդրումները մոտ 400 միլիոն դոլար են կազմում:
Դեսպանը ողջունել է Բեյրութ-Երևան վերսկսված օդային հաղորդակցությունը, որը լիբանանահայերին առանց դժվարության հայրենիք գալու հնարավորություն է տալիս: «Միթըլ իսթ Էռլայնզ» ավիաընկերության չվերթներով այս տարվա ընթացքում ավելի քան 5 հազար հայեր են Լիբանանից մեկնել Հայաստան:
Ըստ Ժան Մաքարոնի՝ Հայաստանը և Լիբանանը քաղաքական ոլորտում ևս սերտորեն համագործակցում են. «Հայաստանն աջակցում է Լիբանանին՝ քաղաքական բոլոր հարցերում, իսկ Լիբանանն, իր հերթին, աջակցում է Հայաստանի քաղաքական բոլոր նախաձեռնություններին»,- հայտարարել է դեսպանը՝ հիշելով 2011 և 2012 թվականներին Լիբանանի և Հայաստանի նախագահների փոխադարձ այցերը, հաստատված բարձր մակարդակի երկխոսությունը, որի ընթացքում ստորագրվել են «Դիվանագիտական և ծառայողական անձնագրերով առանց մուտքի արտոնագրի միմյանց տարածքներ այցելելու մասին», «Բարձրագույն կրթության և ակադեմիական աստիճանների վկայագրերի փոխադարձ ճանաչման մասին» համաձայնագրերը»։
