Լոնդոնի «Արսենալ»-ի միլիոնավոր երկրպագուներ անհամբեր սպասում էին Անգլիայի Պրեմիեր լիգայի առաջին տուրի «Մանչեսթեր Սիթի»-ի հետ մրցավեճին: Նոր «Արսենալ», նոր նվաճումներ. այս նշանաբանով են առաջնորդվում լոնդոնյան ակումբի ղեկավարները Արսեն Վենգերի հեռանալուց հետո:
Ի՞նչ է փոխվել «Արսենալում»: Նոր գլխավոր մարզիչ Ունայ Էմերիի գլխավորությամբ առաջին հանդիպումն «Արսենալ»-ը պարտվեց գործող չեմպիոն «Մանչեսթեր Սիթի»-ին: Պարտությունից հիասթափված երկրպագուներից շատերն այն կարծիքին են, որ Վենգերի հեռանալուց հետո ոչինչ էլ չի փոխվել: «Արսենալ»-ում քիչ չեն նոր ֆուտբոլիստները, և խաղացվածությունը բարձր մակարդակի վրա չէր: «Մանչեսթեր Սիթի»-ի դեմ դաշտի տերերը չխաղացին՝ քանդող պաշտպանողական մարտավարությամբ՝ ինչպես սովորաբար խաղում են «Չելսի»-ն և «Մանչեսթեր Յունայթեդ»-ը:
Ունայ Էմերիի թիմը կարող էր արդյունքի հասնել, սակայն չօգտագործեց բազմաթիվ գոլային հնարավորությունները: Սպասվածից բավական թույլ խաղ ցուցադրեց «Արսենալ»-ի առաջատար Մեսուսթ Օզիլը: Վերջինս շարունակ ստանում էր ազատ տարածություններ, սակայն չէր կարողանում օգտագործել դրանք:
Կրկին բարձրության վրա չէր «Արսենալ»-ի պաշտպանությունը: Նկատենք, որ այս խաղում երկու գոլերը խփվեցին «Արսենալ»-ի պաշտպանության աջ եզրում առկա թերությունների հետևանքով: Առաջին դեպքում Սթերլինգը աջ եզրիչ առանց դժվարության տեղաշարժվեց կենտրոն և հարվածեց, իսկ երկրորդ գոլի դրվագում Մենդին և նույն Սթերլինգը աջ եզրում պարզունակ փոխանցումներով առաջ շարժվեցին, և Մեդին հարվածային դիրք դուրս բերեց տուգանային հրապարակի կենտրոնում հսկողությունից դուրս մնացած Ֆերնանդո Սիլվային: Սրանք բավական կոպիտ սխալներ են, որոնք ստվեր են գցում «Արսենալ»-ի պես թիմի վրա: Այո, Էմերիին որոշ չափով հաջողվել է աշխուժացնել «Արսենալ»-ի խաղը, բայց ոչ ավելին:
Կարծում ենք՝ բոլորի համար է պարզ, որ այս կազմով լոնդոնյան թիմն ուղղակի չի կարող մրցանակային եռյակի համար պայքարել: Տրանսֆերային պատուհանի ընթացքում «Արսենալ»-ի ղեկավարությունը լուրջ քայլեր չի կատարել թիմն ուժեղացնելու համար: Առկա իրավիճակում «Արսենալ»-ի 4-րդ կամ 5-րդ հորիզոնականը զբաղեցնելը կարելի կլինի լավ արդյունք համարել: Էմերիի թիմն ունի մեծ պոտենցիալ և այն ճիշտ օգտագործելու համար, կարծում ենք, երկու-երեք տարի հետո կկարողանա պայքարել չեմպիոնի տիտղոսի համար:
Անդրադառնալով Հայաստանի ազգային հավաքանի ավագ Հենրիխ Մխիթարյանին՝ պետք է նշենք, որ մեկնարկային խաղում մեր ֆուտբոլիստը ցուցադրեց միջին մակարդակի խաղ: Այն խաղը, որը Մխիթարյանը սովորաբար ցուցադրում է: Հայ ֆուտբոլիստը «Արսենալ»-ի ամենափորձառու ֆուտբոլիստներից մեկն է, և Էմերին առաջիկա հանդիպումներում էլ կփորձի օգտագործել հայ ֆուտբոլիստի ունակությունները: «Մանչեսթեր Սիթի»-ի հետ պատասխանատու խաղում Էմերին չփոխարինեց հայ կիսապաշտպանին: Սա խոսում է այն մասին, որ Մխիթարյանն Էմերիի համար կարևոր ֆիգուր է, որի հետ իսպանացի մասնագետը որոշակի պլաններ ունի: Ընդունենք նաև, որ այս պահին Էմերին ըստ էության ձեռքի տակ չունի Մխիթարյանին արժանի փոխարինող: «Whoscored» պարբերականը Հենրիխ Մխիթարյանի խաղը գնահատել է միջինից բարձր 6.7 բալով: Մխիթարյանը 2 հարված է կատարել դեպի դարպասը, իսկ փոխանցումների ճշգրտությունը կազմել է 77%:
«Արսենալ»-ի կազմում ամենաբարձր գնահատականի արժանացել է աջ պաշտպան Բելերինը՝ չնայած երկու գոլերն էլ խփվել են խաղային այս գոտում տեղի ունեցած թերությունների հետևանքով: «Արսենալ»-ի ներկայիս վիճակը Մխիթարյանին հնարավորություն է տալիս վերջապես ստանձնելու թիմի առաջատարի դերը: Օզիլը, Օբամեյանգն ու Լակազետը չունեն խաղընկերներին իրենց ետևից տանելու հատկություն: Մխիթարյանը մեկ անգամ չէ, որ իր վրա վերցնելով խաղը՝ բեկել է հանդիպման ընթացքը:
«Այո, մենք զիջեցինք մրցակցին, բայց միևնույն ժամանակ մրցավեճի ընթացքում լավացրեցինք մեր խաղի որակը: Կարծում եմ՝ դա ակնհայտ էր: Առաջին կեսում կային թերություններ, և թիմն այնպես չխաղաց, ինչպես ծրագրել էինք: Ընդմիջմանը տղաների հետ խոսեցի ու կոչ արեցի նրանց շտկել իրավիճակը: Կարծում եմ, որ երկրորդ կեսում «Արսենալ»-ի խաղը վերափոխվեց, մենք ավելի շատ էինք գրոհում և ստիպում էինք մրցակցի պաշտպաններին անհանգստանալ: Ինչ խոսք, ուզում էինք ուրախացնել երկրպագուներին հաղթական արդյունքով, բայց «Մանչեսթեր Սիթի»-ի պես թիմի հետ խաղում հույսը հաջողության վրա դնել ուղղակի չէր կարելի: Անգլիայի գործող չեմպիոնը հզոր կազմ ունի, որն ուժեղագույններից է Եվրոպայում: Ես շնորհակալ եմ մարզադաշտ եկած բոլոր երկրպագուներից և վստահ եմ, որ «Արսենալ»-ի համար տնային յուրաքանչյուր խաղում լավ աջակցությունը երաշխավորված է»,- լրագրողների հետ հանդիպմանն ասել է Էմերին:
Պրեմիեր լիգայի երկրորդ տուրում ևս «Արսենալ»-ին ծանր հանդիպում է սպասվում: Օգոստոսի 18-ին արտագնա խաղում լոնդոնյան դերբիում Էմերիի թիմը կխաղա «Չելսի»-ի հետ:
