«Սերժ Սարգսյանի և Ռոբերտ Քոչարյանի դեմ պայքարի 23 տարվա ստաժ ունեմ: 97թ-ին, երբ Ռ. Քոչարյանը վարչապետ դարձավ, ես լուրջ խոսակցություն եմ ունեցել Լ. Տեր-Պետրոսյանի հետ՝ ասելով, որ նա իր գերեզմանափորն է լինելու, և այդպես էլ եղավ,- «Առաջին լրատվական»- ի հետ զրույցում այս մասին ասաց Հայաստանի քաղաքացիական ավիացիայի գլխավոր վարչության նախկին պետ Շահեն Պետրոսյանը: – Այս պատմությունն ունի ցավալի էջ. Սահմանադրության խախտման ամենացավալի պահը 98թ-ին էր, երբ ոմն Ալվինա Զաքարյան տեղեկանք էր տվել, որ իբրև թե Ռ. Քոչարյանը վերջին 10 տարում ապրել է Հայաստանում: ՀՀ քաղաքացիության օրենքով Ղարաբաղի բնակիչներին քաղաքացիություն չէր տրվում, տրվում էր անձնագիր, որ կարողանային ճամփորդել»:
«Քոչարյանը Մոսկվա գնաց և վերադարձավ ռուսական իմպերիալիզմի դաբրոյով»,- նշեց Շ. Պետրոսյանն, ով Մարտի 1-ի իրադարձությունների ականատես է: Նրա խոսքով՝ Մարտի 1-ի տեսարանն ահավոր էր. «Նույնիսկ սայլակին նստած կնոջն էին փորձում մահակով խփել… ժողովրդին ծեծում էին ամենադաժան ձևով: Կան մարդիկ, որոնք հանցակից են Մարտի 1-ի իրադարձություններին, նրանք պաշտպանում են Քոչարյանին, իրենց անուններն էլ ամոթից չեն նշում: Դե թող հանրահավաք անեն»:
«Երբ որ պարզվի, որ Քոչարյանի «նկուղում» դիակներ են, Սահմանադրության խախտումներ են, կեղծ փաստաթղթերն են, Հայաստանի սեփականությունն է, որ իրենով արեց ու ռուսներին տվեց, հանքարդյունաբերությունը, որ վարի տվեց Հայաստանը, վերացրեց մեծ դժվարությամբ ստեղծված հայկական ավիացիան. մենք չունենք ազգային փոխադրող. ո՞վ է պատասխան տալու: Բոլոր ոլորտներում բաժանում տեղի ունեցավ, Ամերիկայից ներդրողներ եկան, նրանց «քցեցին», էդքան մարդ ինքնասպան եղավ…: Կենտրոնի բնակիչներին խոստումներ տվեցին, նրանց իրենց տներից հանեցին ու խոստումները չկատարեցին, դրա համար պատասխան պիտի տա՞ն, թե՞ չէ»,- նշեց քաղավիացիայի գլխավոր վարչության նախկին պետը:
Նա նաև նշեց, որ ժամանակին Քոչարյանն իրեն էլ է գործարք առաջարկել. ««Արաքս» ավիաընկերության 50 տոկոսն էր ուզում, բայց դա իմը չէր: Դրանից հետո ես նրան քննադատում էի, իսկ նա, լինելով քինախնդիր մարդ, անընդհատ հետապնդում էր, ինձ ուղղակի քրքրեց»:
«Կարծում եմ՝ Քոչարյանին առաջադրված մեղադրանքը հիմնավոր է և շատ ծանր հանցագործության մեղադրանք է: Նրան պաշտպանողները հակահեղափոխական դաշինք են ստեղծում: Ժողովուրդը օգոստոսի 17-ին ցույց կտա, թե ինքն ում կողմից է»,- ընդգծեց մեր զրուցակիցը:
Մանրամասն՝ տեսանյութում:
