Որքան մոտենում ենք Երևանի ավագանու արտահերթ ընտրություններին, այնքան հետաքրքրական է դառնում ներքաղաքական կյանքը Հայաստանում: Քարոզչության ոչ պաշտոնական մեկնարկը կարելի է տրված համարել: Արդեն պարզ է, թե ովքեր են լինելու հիմնական խաղացողները: Թեմայի շուրջ «Առաջին լրատվական»- ի հետ զրույցում քաղտեխնոլոգ Վիգեն Հակոբյանը նշեց. «Բավականին տարօրինակ իրավիճակ է ստեղծվել, քանի որ բոլոր այն քաղաքական ուժերը, որոնք արդեն հայտ են ներկայացրել, կա՛մ իշխանություն են, կա՛մ աջակցում են իշխանությանը, այսինքն՝ եթե խոսենք հանրային տրամադրությունների մասին, ընդդիմության բացակայությունը հուշում է այն մասին, որ, այնուամենայնիվ, կա ինչ-որ մի խավ, որ ոգևորված չէ այսօրվա իշխանություններից և նրանց շահերը պաշտպանող ներկայացուցիչները չեն մասնակցում ընտրություններին: Մինչև այս պահը, բացի ՀՀԿ-ից, ոչ մի քաղաքական ուժ ընդդիմություն լինելու կամ դառնալու հայտ չի ներկայացրել: Իսկ ՀՀԿ-ն, ինչպես շատերը կանխատեսում էին, դժվար թե մասնակցի այս ընտրություններին, դա տրամաբանությունից դուրս կլիներ, քանի որ չի ցանկանա արձանագրել իր ցածր տոկոսը»:
Հարցին՝ ո՞ւմ օգտին կքվեարկեն հեղափոխությունից դժգոհողները, քաղտեխնոլոգը պատասխանեց՝ կընտրեն այն քաղաքական ուժին, որը, ըստ իրենց, առավելագույնս շանս կունենա ձայներ հավաքելու ընդդեմ գործող իշխանության:
«ԲՀԿ-ում տարօրինակ իրավիճակ է․ չի բացառվում՝ արտաքին ինչ-որ ազդակներ կան»,- նշեց քաղտեխնոլոգը՝ հավելելով, որ ընտրությունների արդյունքի վրա կարող է ազդել վարչապետի վճռականությունը՝ ընտրություններից հանել ֆինանսական գործոնը:
Մանրամասն՝ տեսանյութում:
