«Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը կապ չի տեսնում ՌԴ ԱԳ նախարար Սերգեյ Լավրովի և Քոչարյանի կալանավորման դեմ նրա փաստաբանների բողոքը մեկ օրով ուշացնելու միջև. «Պատճառը բոլորովին այն չէ, որ Քոչարյանի փաստաբանները հուսով են, թե Լավրովի հայտարարությունն ինչ-որ կերպ կազդի Հայաստանի դատարանների վրա»:
«Ինձ համար տարօրինակ է, որ Լավրովը Հայաստանի իշխանություններին է կոչ հղում, որովհետև Հայաստանի քաղաքական իշխանությունները չպետք է ազդեն դատական համակարգի վրա»,- «Առաջին լրատվական»-ի հետ զրույցում նշեց Իոաննիսյանը՝ հավելելով, որ դատական համակարգը պետք է կաշկանդված լինի միայն գործող օրենքներով և միջազգային համաձայնագրերով:
Մեր զրուցակիցը չի պատկերացնում, որ ՀՀ ԱԳՆ-ն կարող է մեկնաբանել ՌԴ-ում ընթացող դատական պրոցեսը՝ հայտնելով իր կարծիքը, թե որքանով է դա քաղաքական հետապնդում:
Իոաննիսյանը տարօրինակ է համարում նաև այն, որ Լավրովը իր հայտարարության մեջ ասում է, թե հակասություն է տեսնում գործող իշխանության նախընտրական խոստումների և այս իրադարձությունների միջև. «Նախընտրական խոստում է տրվել, որ չի լինելու քաղաքական վենդետա: Քաղաքական վենդետա էր Չաուշեսկուին ըստ էության առանց դատ ու դատաստանի գնդակահարելը կամ Քադաֆիին դանակահարությամբ սպանելը: Հայաստանում որևէ մեկը ամնիստիա չի խոստացել, այսինքն՝ որ նախկինում կատարված հանցագործությունների համար բոլոր իշխանավորներն ու պաշտոնյաները ներված են: Եվ չէին էլ կարող հայտարարել, որովհետև նման հայտարարությունն ուղղակի կհակասեր Սահմանադրությանը»:
Հարցազրույցն ամբողջությամբ՝ տեսանյութում:
